Chavit imbilinna pannakaiparit oversized a baboy maiserrek iti Ilocos Sur

VIGAN CITY – Saanen a mabalin nga iserrek dagiti traders dagiti baboy nga agdagsen iti 100 a kilo agpangato tapno maliklikan ti pannakaapektar dagiti backyard raisers ditoy Ilocos Sur, daytoy ti napagnunummuan dagiti kameng ti Ilocos Sur Hog Raisers Association bayat ti pannakidialogoda ken ni Gov. Chavit Singson iti Baluarte idi Enero 6.

Impakaammo dagiti agtartaraken iti baboy a dakkel unayen ti pukawda ken awanen ti mayat a gumatang iti tarakenda a baboy gapu iti pannakaiserrek dagiti nalaka nga oversized a baboy manipud iti probinsia ti Pangasinan ken Bulacan.

Innayon pay dagitoy a makunan a reject dagiti baboy nga agdagsen iti 100 kilos agpangato gapu ta saandan a maibilang a prime meat isu a nalaka ti panaggatangda iti daytoy. Mapan a P75-P78 ti presio ti live weight dagitoy a maiserserrek, nalaklaka no ikumpara iti magmagna a presio a P90-P95 kada kilo dagiti baboy nga agdagsen iti nakurang a 100 kilos a mailaklako ditoy probinsia.

Naammuan pay iti dialogo nga adun dagiti backyard raisers a nangisardeng iti panagtarakenda iti baboy kalpasan a rimsua ti parikut kasta met nga addan sumagmamano a piggery ditoy a nagsardeng ti operasionna a nangitunda iti pannakapukaw ti trabaho dagiti adu a mangmangged.

Maysa pay nga isyo a rimmuar ti kinalukay dagiti agbambantay iti quarantine a nakabase iti Bio, Tagudin a napusgan a mangkita ken mangresibo kadagiti maiserrek a dingo iti Ilocos Sur. Mapapati a saan a maisursurat ti umiso a bilang dagiti maiserrek a baboy kasta met nga adda dagiti gundaway a P200 laeng ti makolkolekta a bayad ti tunggal baboy imbes a P500 a kas napagnunumnuan iti kaudian a panagsasarita ti gobierno probinsial ken dagiti hog raisers idi Oktubre 2011 ken adda pay awan a pulos ti maipakitada a resibo.

Iti maysa nga interbiona iti DWRS, linagidaw ni Vigan City Mayor Eva Marie S. Medina no apay nga adda dagiti makalusot a meat products iti quarantine iti Tagudin a naiserrek a mailako iti tiendaan publiko iti siudad ti Vigan.

Sakbayna, indauluan ni Mayor Eva Marie S. Medina ken ti agriculture office iti panangidaulo ni City Veterinarian Liborio Arca a nangisayangkat iti operasion iti tiendaan publiko ket kinumpiskada dagiti frozen a karne ken laplapayag a mailaklako iti tiendaan kalpasan nga awan ti naipakita dagiti negosiante a dokumento a pammalubos kadakuada a mangiserrek kadagitoy a tagilako iti tiendaan publiko.

Kinuna ni Medina nga adda napartuat nga ordinansa ti siudad a masapul a maparti amin iti slaughterhouse dagiti mailako a karne ti baboy iti tiendaan idinto a linagidawna no kasano a naipuslit dagiti na-chop-chop a karne iti Ilocos Sur idinto nga adda met quarantine checkpoint iti Tagudin.

Mainaig itoy, nangipaulog ni Gov. Singson iti maysa nga Executive Order tapno dagus a malapdan ti pannakaiserrek dagiti oversized a baboy iti probinsia. Nangpili metten dagiti hog raisers iti innem a kameng ti grupoda a mainayon nga agbantay iti quarantine ken suelduan ti probinsia tapno nainget a maiyimplimentar ti linteg ken malapdan ti panagpasuksok a maar-aramid. Dagus pay a kinapatang ti gobernador dagiti hepe ti PNP iti tallo nga ili a pakaibilangan ti Sinait, Tagudin ken Narvacan tapno isuda ti mangidaulo iti pannakasita dagiti maiserrek a baboy iti probinsia.#