Chavit nadismaya kadagiti mannalon a naglako bayat ti negosasion a maipangato ti presio ti tabako

VIGAN CITY – Dismayado ti gobernador gapu ta adda dagiti mannalon a naglako latta iti tabakoda bayat ti kangitingitan ti panangikalikagumda a maingato ti presio daytoy a produkto.

“Kimmapsut ti puersa gapu kadagiti naglako latta iti tabakoda iti laksid ti panawaganmi nga isardengda pay laeng ti agilako. ,” kinuna ni Singson.

Kinuna ti gobernador a saan a kuntento ti gobernador iti P3/kilo a a nangipangatuan ti Philip Morris Philippines a presio ti tabako agsipud ta bassit unay daytoy no ikumpara iti P30 a dinawat dagiti mannalon iti tabako.

“Nupay diak kuntento iti ngimmatuanna, awan mabalinko no napneken dagiti mannalon,” kinuna ni Singson.

Itay napan a lawas, maysa a surat manipud iti Philip Morris ti dimmanon iti opisina ti gobernador nga agkunkuna a maikkan iti P3 a kas gunggona dagiti mannalon iti tunggal kilo a nailakoda kadagiti trading center a konektado iti kompaniada.

Nupay kasta, maysa a dakkel a saludsod no maala dagiti mannalon a nagilako kadagiti koboy ti nasao nga insentibo.

“Narigaten a makaala dagiti mannalon a naglako kadagiti koboy. Isu ngarud a nasaysayaat no direkta koma a mapan aglako dagiti mannalon kadagiti trading centers,” kinuna ni Singson.

Inamin ti gobernador nga adda ladladaw ti panaggarawna isu nga inton sumaruno a tobacco season, nasapsapanton ti panagkutina tapno masigurado ti napintas a presio daytoy a produkto ti Ilokandia.

Impalgak pay ni Singson a nakasaritanan da Gov. Eustaquio Bersamin ti Abra ken Gov. Manuel Ortega ti La Union ket impasigurado metten dagitoy ti pannakikaysada iti pannakaingato ti presio ti tabako.

Kinuna ni Singson a kapatangnanto ni Gov. Imee Marcos ti Ilocos Norte agsipud ta saan pay a kumanunong daytoy iti labanda a mangipangato iti presio ti tabako.

“Ti imbaga ni Gov. Marcos iti kolumna iti maysa a magasin a P120/kilo ti presio ti tabako iti Ilocos Norte ket saan a nakapapati. Maymaysa laeng ti gumatgatang iti amin a tabako iti Ilokandia ta nagtiponen ti Philip Morris ken Fortune. Masapul siguro nga i-checkna ti presio tapno malawlawagan iti pudno a situasion ti industria ti tabako,” kinuna pay ni Singson.

Madama ita ti panangsiput ti opisina ti gobernador ken dagiti dua a kongresista ti Ilocos Sur no adda pay  pagpangatuan ti presio iti sumaganad nga aldaw.

Adda panagamak dagiti mannalon iti panagpababa ti presio ti tabako kalpasan ti Semana Santa nga aw-awaganda iti Semana Syndrome kas kapaliiwan a napasamak kadagiti kallabes a tawen.#