Footer

Chavit, padayawan ti Hunta Probinsial

VIGAN CITY – Maysa a draft resolution ti naidatag itay Oktubre 2 iti sangguniang panlalawigan a mangipaay iti pammadayaw ken ni naggobernador Luis “Chavit” Singson gapu iti dakkel nga akemna iti pannakapadisi ti nakatugaw idi iti kangatuan a pangopisinaan iti pagilian.

Pinal nga inaprobaran ti konseho ti nasao a resolusion ket manamnama a maiyawat daytoy ken ni Singson iti mabiit.

Sinaguday ti resolusion a nangrugi ti kaso iti maaw-awagan a “juetengate” a pinabettak ti dati a gobernador idi Oktobre 8, 2000 a nakaigapuan ti  pannakausig ni Estrada babaen ti impeachment iti Senado a nagtunged iti pannakapadisina iti puesto ken pannakaipatugaw ni Pres. Gloria Macapagal-Arroyo ken iti pannakaidarum ni Estrada iti plunder iti Sandiganbayan.

Imbulgar ni Singson nga immaw-awat ni Estrada iti payola manipud iti koleksion ti hueteng ken nangala iti P130 milion a bingay ti probinsia iti R.A. 7171.

Ni met laeng Singson ti maysa kadagiti kangrunaan a testigo ti prosekusion iti pannakausig ni Estrada iti kaso a plunder iti Sandiganbayan.

Kadua ni Singson a nagtestigo ni Clarissa Ocampo a nangibaga a sangadapan laeng ti kaadayona ken ni Estrada idi agpirma daytoy a kas Jose Velarde kadagiti dokumento ti banko.

Idi Setiembre 12 daytoy a tawen, sinentensiaan ti Sandiganbayan ni Estrada a mapatawan iti pannusa a reclusion perpetua wenno mabalud iti 40 a tawen kalpasan a napaneknekan a nakabasol iti plunder.

Nupay kasta, not guilty ti naipataw kada Sen. Jinggoy Estrada ken ni Edward Serapio, a mapapati nga immawat iti P200 milion manipud iti koleksion ti hueteng a naipan iti Muslim Foundation nga impasdek ti Presidente.

Segun iti resolusion, nagpeggad ti biag ni Singson gapu iti iruruarna a nanglaban iti kangatuan nga opisial iti pagilian ken uray iti agdama gapu ta adu pay  dagiti mangsupsuporta iti napadisi a Presidente.

Kinuna pay ti resolusion nga iti iruruar ti desision ti Sandiganbayan, pinaneknekanna a saan  a salawasaw ti dati a gobernador a kas awag kenkuana ni Erap ken dagiti loyalista a kaduana.#