Chavit, sinelebraranna ti kasangayna iti naseksek a barangay

NAGBUKEL, Ilocos Sur. – Iti maysa a naseksek a barangay daytoy nga ili ti nangrambakan ni Gobernador Luis Chavit Singson ti panagkasangayna itay Hunio 21.

Nagturong a mismo ni Singson iti Barangay Cosocos, kaadaywan a barangay daytoy nga ili, kas panangipakitana ti panagyamanna kadagiti agnaed ditoy a barangay a nagpinsan a nangitedĀ  iti suportada kenkuana idi eleksion ti kinagobernador idi Mayo 10, 2010.

Naibbong ditoy a barangay ni dati a Bokal Efren Rafanan, Sr. a kinasango ni Singson para gobernador.

KaduaĀ  ni Singson ni Nagbukel Mayor Timoteo Cabrera, OIC PNP Provincial Director Senior Superintendent Reynante Partible, kenĀ  dadduma pay a lokal nga opisial a nagturong iti nasao a barangay iti aldaw ti kasangayna.

Nangitugot ti grupo ni Singson kadagiti regalo a pakairamanan ti groceries, wall clock, bags ken dadduma pay a naiwaras tunggal bubongan ditoy a barangay.

Inkari pay ti gobernador a mangted iti pundo para iti pannakasimpa ti water system ti nasao a lugar, ken ti maysa a Delica van nga agpaay a lugan ti barangay.

Napalaus met ti panagyaman ni Cosocos Barangay Captain Esther Sape gapu iti panangdanon kadakuada ti gobernador a nagbiahe iti agarup 12 a kilometro manipud iti munisipio ti Nagbukel, Ilocos Sur.

Kinantaan dagiti bumarangay ti gobernador bayat ti panangpuyotna iti birthday cake. Nakilanglang ti gobernador kadakuada iti pangngaldaw.

Kalpasan ti pangaldaw ti gobernador iti Cosocos, nagsubli iti sentro ti Nagbukel ket ditoy a sinangona dagiti nagkaadu a bisitana a nangkablaaw kenkuana iti panagkasangayna.#