Chief tanod, nagpangta, nagpaputok

VIGAN CITY – Inreklamo ti maysa a lumugar iti Barangay Puroc a Dackel ditoy siudad ti maysa a chief tanod gapu iti panangpangta daytoy kenkuana ken panagpaputokna iti paltog idi sardam ti Agosto 17.

Segun ken ni Nestor Juan y Orlanda, 56, naasawaan, magmagna iti igid ti dalan nga aggawid iti balayda iti dayta a sardam idi inabay ti Mitsubishi Lancer a nagluganan ni Ronald Andallo y Flores, 41, naasawaan, chief tanod, ket sinitar daytoy.

Mapapati a nakainom ni Andallo iti dayta a kanito.

Kinuna ni Juan a sinurot ni Andallo agingga iti sanguanan ti balayna ket prinobokar ken pinangtaan daytoy.

Mapapati a nagpaputok ti chief tanod iti namitlo a daras sana pinaltogan ti balay ti biktima a nakatiruan ti jalousie ti tawa ti balay.

Inaresto dagiti nagresponde a polis ni Andallo ngem awanen ti paltog daytoy.

Nupay kasta, nakarekobre dagiti polis iti uppat a kapsula manipud iti cal. 45 iti nakapasamakan ti insidente.#