Komentario: Panagbangon ti China Telecom facilities iti uneg dagiti kampo ti militar | Tawid News Magazine - Weekly Ilocos News 📰

Panagbangon ti China Telecom facilities iti uneg dagiti kampo ti militar

SAAN koma a palubosan ti gobierno ti Pilipinas ti pannakabangon dagiti pasilidad ti China Telecommunication Company iti uneg dagiti kampo ti Armed Forces of the Philippines ta amangan no maaramatda nga instrumento iti panagespia a makadakes iti pagilian.

Dinillaw ni Senator Francis Pangilinan ti pannakapirma iti Memorandum of Agreement iti nagbaetan dagiti pannakabagi ti Armed Forces of the Philippines ken Dito Telecommunity Corp., ti maikatlo ken kaudian a kompania a naikkan iti prangkisa nga ag-operate iti Pilipinas mainayon ti Globe Telecom ken Smart Communication.

Nagpirma iti MOA da AFP Deputy Chief of Staff for Communications, Electronics and Information Systems Maj. Gen. Adrian Sanchez ken Dito Chief Administrative Officer Adel Tamano para ti katulagan dagiti dua a partido. Naipasan ti MOA iti opisina ni Defense Secretary Delfin Lorenzana para ti pannakaaprobar ti katulagan.

Agamak ni Senador Pangilinan iti pannakapirma ti katulagan iti nagbaetan ti AFP ken Dito Telecommunity Corp., sigud a Mislatel, ta ti kompania ket maysa a consortium a buklen ti China Telecom, Chelsea Logistics and Infrastructure Holdings ken Udenna Corporation.

Agdudua ni Senador Pangilinan ta amangan a ti Chinese government ket mandarenna ti China Telecom nga agkalap kadagiti impormasion manipud iti Pilipinas kas mayataday iti 2017 National Intelligence Law ken 2014 Counter-Espionage Law ti China kas ti napasamak sadiay Hong Kong a nakainaigan ti kompania a Cathay Pacific.

Adda dagiti umili nga agatap a nausar ti impluensia iti pannakaipaay ti prangkisa iti Dito Telecom ken pannakapirma ti MOA iti nagbaetanda iti AFP ta kompania ket kukua ti Davao businessman a ni Dennis Uy. Maysa ni Uy kadagiti kadakkelan iti campaign contribution para iti pondo ni Presidente Rodrigo Duterte idi panawen ti kampania.

Inlawlawag ti liderato ti AFP a ti Dito Telecom ket nagdalan iti nainget a proseso iti pannakagun-odna iti prangkisa; ken ti pannakapirma ti MOA iti baetda ken ti AFP ket kas met laeng ti impaayda iti GlobeTelecom ken Smart Communication, ket kayatda a padapadaen ti panangtratarda kadagiti tallo a kompania. Ngem ti Globe ken Smart ket agpada a bin-ig a Pilipino a kompania.

Impasingked ni Brig. Gen. Edgar Arevalo, AFP Spokesman kadagiti umili nga awan ti rumbeng a pagdanaganda iti katulagan a napirmaan a mangipalubos iti pannakabangon ti pasilidad ti China Telecom iti uneg dagiti kampo ti AFP ta adda naan-anay a wagas a panangpatalgedda iti data security. Inlawlawagna a ti Dito Telecom ket pimmasan iti nainget a proseso a pannakaarisit sakbay a naikkan iti prangkisa nga ag-operate iti iti Pilipinas. Inrakurakna a mapalubosanda nga agbangon iti pasilidad iti uneg ti kampo tapno saanda a pisikal nga agassideg kadagiti AFP communications facilities. Inlawlawagna a mangipapaayda iti natalged ken nasayaat a lugar ti communication signal para ti pagsayaatan ti publiko. Impaganetgetna a kasta met laeng ti katulaganda iti Globe Telecom ken Smart Communication.

Iti katulagan, ti AFP ket mangbirok iti lokasion iti uneg dagiti military camps and installations a pangipatakderan ti Dito Telecom kadagiti communications facilities nga addaan iti anti-espionage guarantee kadagiti amin nga ikapetda a ramit ken alikamen ket saanda a mausar nga agkalap kadagiti classified information. Kas renta iti panagyan dagiti pasilidad ti Dito Telecom kadagiti military camps, mangipaayda met iti AFP kadagiti alikamen, system upgrades, services and training a kaibatogan ti monetary value ti renta ti kompania.

Saan a maliklikan ti panagdudua dagiti umili iti pannakaaramat dagiti pasilidad ti China Telecom iti electronic espionage wenno panagespia kadagiti confidential information nangruna itan a moderno ti teknolohia iti komunikasion ken managdepender unayen dagiti technical personnel kadagiti kabaruanan nga alikamen, ket adun dagiti henio iti electronic and information systems a kabaelanda a biangan wenno i-hack dagiti telecommunication networks kas ti napasamak sadiay Pentagon a Headquarters ti United States Armed Forces.

Adda dagiti agdudua iti kasla naiganat a pannakapirma ti MOA ta mismo a ni Defense Secretary Lorenzana ket adda sadiay ballasiw-taaw ken saanna nga ammo ti katulagan ken pannakapirmana, sakbay ti pannakaiyendorso iti opisinana.

Mangnamnama dagiti umili iti naannad a panangamiris ni Sec. Lorenzana iti MOA ta impalgakna idin ti panagduduana iti pannakabangon dagiti Philippine Offshore Gaming Operations hub a pagyanan dagiti adu a Chinese nationals, iti asideg dagiti kampo ti militar ta mabalin a mausarda iti panagespia. No mapagam-amkan pay ti pannakikaarruba dagiti POGO hub kadagiti military camps, ad-addan a nakaam-amak no mismo a pasilidad ti China Telecom ket maipatakder iti mismo nga uneg dagiti kapo ti military.

Uray ni National Security Adviser Hermogenes Esperon ket ibilangna a security risk ti pannakabangon dagiti POGO hub kadagiti asideg dagiti military camps ken panagadu dagiti illegal a Chinese workers iti Pilipinas a nagrairan iti pagilian. Ad-addan a security risk no addanto metten dagiti Chinese technical personnel nga agtrabaho kadagiti China Telecom facilities kadagiti uneg dagiti military camps.

Rebbengna nga adalen ken repasuen a nasayaat ti Department of National Defense ti MOA iti nagbaetan ti AFP ken Dito Telecom, ket tingitingenda a nasayaat ti implikasion ti kaadda ti telecom facility ti China Telecom iti uneg dagiti military camps ta narisgo daytoy iti seguridad ti gobierno.

Saan nga umanay ti monetary benefit iti magun-od a renta nga ipaay ti Dito Telecom iti AFP no iti masakbayan ket makaapekto met iti seguridad iti pagilian aglalo ket agtultuloy ti panagdappat ti China iti teritorio ti Pilipinas iti West Philippine Sea ken saan met a bigbigen ni Chinese Government ti pangngeddeng ti International Court a paset ti Extended Economic Zone dagiti teritorio a sinakup ti China ken awan ti legal a pagbasaran ti 9-Dash Line nga ipilpilit ti Chinese Government a kukuada ti nalawa a paset ti South China Sea.

Adu unayen dagiti pribelehio ken benepisio nga ipapaay ti gobierno ti Pilipinas kadagiti umili ken kompania ti China. Naglawan dagiti teritorio a nadappatanda, ket rebbengna a saanda metten koman a mapastrek kadagiti uneg ti kampo dagiti military gapu laeng ta agbayadda iti upa wenno renta ta seguridad ti pagilian ti nakataya.●