BANTAY, Ilocos Sur – Maisuron ti Chinese Mandarin nga special course iti Ilocos Sur Community College (ISCC) mangrugi iti daytoy a semestre.

Kinuna ni Gov. Deogracias Victor Savellano a dakkel  ti maitulong ti panagsursuro dagiti estudiante iti nadakamat a lengguahe nagruna kadagiti HRM ken Tourism students.

“Gapu iti kinaasideg ti Ilocos Sur iti pagilian ti China, kaaduanto a Chinese ti  klienteda ket bentaheda no makasaoda dagitoy iti bukodda a pagsasao,” kinuna ti gobernador.

Dua a Chinese ti agnaed iti probinsia iti makatawen a mangisuro iti kurso.

Mangipaay pay ti gobierno ti China kadagiti libro a makatulong iti panagadal dagiti estudiante itoy a kurso.

Kabayatanna, nagkiddaw metten ni Savellano iti pagilian a Korea para iti posible a pannakaisuro ti Korean language iti ISCC iti masanguanan gapu iti panagadu dagiti Koreano a turista nga um-umay iti probinsia.#