Chinese national, 8 pay, pinanggepda agibiahe black sand

SAN VICENTE, Ilocos Sur – Adda manen mailiblibas a maibiahe a black sand manipud ditoy probinsia?

Agparparang a kasta kalpasan a siam a tattao ti naipan iti police station ditoy tapno mapalutpotda mainaig iti mapapati a panagpanggepda nga agipuslit iti black sand manipud iti maysa a sitio ti maysa a coastal barangay ditoy nga ili idi malem ti Marso 8, 2014.

Segun iti report manipud iti police station ditoy nga ili, idi agarup 12:30 ti malem ti nadakamat a petsa, nakaawatda iti tawag iti telepono manipud iti maysa a maseknan nga umili nga adda mapapati a maisaysayangkat a panagbunag iti black sand  iti Sitio Quinarabangbangan, Barangay San Sebastian.

Nagturong dagiti polis nga indauluan ni SPO3 Mario Lived iti nasao a lugar ket ditoy a nadatnganda ni Fr. Albert Rabe y Rosario, 55, kura paroko ti San Juan, Ilocos Sur, kaduana dagiti kameng ti Philippine Army nga indauluan ni Cpl. Jhon Dan Villaflor ti 81st IB 7ID PA a nakadetalye iti Sitio Namnama, Barangay Tamorong, Sta. Catalina, Ilocos Sur.

Mapapati a maikarga koma dagiti sinaksako a black sand iti maysa nga Isuzu Forward ngem nagbaw-ing ti lugan gapu ta adu dagiti soldado iti pagbunaganda a lugar.

Segun iti report, pinasardeng dagiti soldado ti nasao a lugan sada tinengngel dagiti naglugan a siam a tattao a pakairamanan ti maysa a Chinese national nga agnagan iti Zhiyuan Hu, 28, baro, businessman, ken temporario nga agindeg iti 505 T3 Bay view Tower, Roxas Blvd. Tambo, Parañaque City.

Impaima dagiti soldado kadagiti nagresponde a polis ti Chinese national ken dagiti walo a kakaduana a mapapati a natangdanan nga agbunag iti black sand a pakaibilangan da Walter Riberal y Santos, 20, baro;  Alfredo Retreta y Rigunay, 45; Dennis Lucero y Ragunton, 45, naasawaan, mangngalap; Rodolfo Rabago y Reotutar, 27, naasawaan, mangngalap; Manny Lorenzo y Rugnao, 43, naasawaan; Rey Aquino y Rutab, 45, naasawaan, mangngalap; Nestor Aquino y Rutab, 43, mangngalap; Joseph Rugnao y Tuzon, 30, baro, drayber ken agpapada a residente iti Brgy San Sebastian.

Napinget a konkontraen ti Simbaan ti panagminas iti kabaybayan a sakup dagiti coastal barangays iti probinsia gapu ta daytoy ti mapapati a makagapu iti panagrissuod ti daga iti igid ti baybay ken puon ti pannakalayus dagitoy lugar.

Mismo a ni Justice Secretary Leila de Lima ti immay ditoy a nangibilin ti panag-sardeng iti panagminas iti black sand iti kabaybayan iti Ilocos Sur.#