Chinese national, naaresto

SAN VICENTE, Ilocos Sur – Maysa a Chinese national a sumangsango iti kaso iti maysa a korte ditoy nga ili ti inaresto dagiti polis idi malem ti Enero 8.

Inaresto dagiti polis-San Vicente ni Zhiyuan Hu y Li, Chinese national ken residente iti 73 Bayview Tower, Roxas Boulevard, Metro Manila babaen ti bileg ti warrant of arrest nga inyisio ni Judge Rogelio A. Ringpis ti Second Municipal Circuit Trial Court, San Vicente-San Ildefonso, Ilocos Sur.

Sumangsango ni Hu iti panaglabsing iti RA 7942 wenno Philippine Mining Act of 1995 a nai-docket iti babaen ti Criminal Case No. 845 a napetsaan Nobiembre 20, 2014 ket nairekomenda ti piansana a P6,000.00.

Naipan ti akusado iti police station ditoy para iti booking ngem napalubosan met laeng kalpasan ti panagpiansana.#