Panagadu dagiti Chinese workers gapu iti POGO, pangta iti seguridad iti Pilipinas

“PANGTA iti nailian a seguridad iti Pilipinas ti agtultuloy a panagadu dagiti Chinese workers iti pagilian a kaaduanna ket agtatrabaho kadagiti kompania ti electronic gambling iti Philippine Offshore Gaming Operators (POGO) a baybayabayen ti Philippine Amusement Gaming Corporation (PAGCOR).

Dayta ti nagkaykaysa a kapanunotan ni National Security Adviser Hermogenes Esperon, ken dagiti dadduma a senador iti agtultuloy a panagadu dagiti Chinese workers iti Pilipinas manipud idi agtakem ni Presidente Rodrigo Duterte ket nayusuat ti e-gambling industry iti Pilipinas a kangrunaan a kliente ket dagiti Chinese nationals.

Addan 58 a lisensidado a kompania iti POGO, ken nasurok a 135,000 Chinese workers nga agtatrabaho iti daytoy nga industria ti e-gambling.

Segun ken ni PAGCOR Chair Andrea Domingo, saan a pangta iti national security ti panagadu dagiti Chinese workers iti e-gaming industry iti Pilipinas ta dagitoy ket gagangayda a mangmangged nga agkasapulan iti pagtrabahuan kas kadagiti Overseas Filipino Workers a mapmapan mangmangged sadiay sabali a pagilian. Inlawlawagna a dakkel ti mapastrek ti gobierno ti Pilipinas iti ingreso ken buis manipud kadagiti kompania iti POGO a mausar para kadagiti programa ken proyekto.

Idi 2016, inyetnag ti PAGCOR dagiti pagallagadan mainaig iti operasion ti POGO. Daytoy ket maysa nga entity a mangidiaya ken mangmanehar kadagiti “offshore gaming services” babaen ti panangipaay iti ay-ayam kadagiti agsugal, agkolekta iti pusta, ken agbayad kadagiti mangabak nga agpusta. Dagiti ay-ayam ket dagiti “online games” nga agbasar iti suerte iti internet, babaen ti panagaramat iti network ken software nga eksklusibo a para laeng kadagiti offshore-authorized players a nakapagrehistro ken addaanen iti online gaming account iti PAGCOR-licensed POGO. Dagiti Pilipino uray no addada iti sabali a pagilian ket saanda a mapalubosan nga agay-ayam iti e-games ti POGO ket kaaduanna dagiti Chinese nationals ta maiparit ti amin a klase ti sugal sadiay China.

Mangited ti PAGCOR iti POGO license kadagiti kualipikado nga operators, mabalin a Filipino-based operators wenno foreign-based operators.

Ti POGO ket sakupenna dagiti service providers a mangipaay iti serbisio kadagiti nagduduma a paset ti operasion ti ay-ayam kas ti gaming software provider, business outsourcing provider, ken content streaming provider. Dagiti mangipaay kadagitoy a serbisio ket kasapulan pay a mangalada iti lisensia iti PAGCOR tapno mayusuatda ti operasionda.

Maibasar iti Revenue Memorandum Circular (RMC) No. 102-2017, dagiti POGO operators ken accredited service providers ket agbayadda iti tallo a klase ti tax wenno buis: Income tax from gaming operations, Income tax from non-gaming operations, ken Tax from compensation, fees, commissions, and other remuneration para kadagiti serbisio nga impaay dagiti trabahador ken service providers.

Iti agdama, kaaduan kadagitoy a Chinese e-gaming companies ket addada iti Metro Manila kangrunaanna kadagiti commercial district sadiay Pasay City ken Parañaque City. Gapu iti konsentrasion dagitoy a kompania a dagiti trabahadorda ket Chinese met laeng, nagbalinen dagitoy a lugar a kasla Binondo Chinatown iti Manila a nagdudupudopan dagiti Tsino.  

Gapu ti agtultuloy a panagadu dagiti e-gaming companies ken Chinese workers iti Pilipinas ket adu kadakuada dagiti mainanaig kadagiti dakes nga aramid ken illegal nga aktibidad pakairamanan dagiti krimen a panagkidnap ken pammapatay, addan dagiti gakat ken plano a mangbangon kadagiti POGO hubs sadiay Kawit, Cavite ken Clark Economic Zone, Pampanga, tapno pagyanan dagiti e-gaming companies ken pagnaedan dagiti Chinese workers.

Impeksan ti Chinese Embassy iti Manila iti saanda a naan-anay a yaanamong iti plano ti PAGCOR nga iyakar dagiti rinibu a Chinese workers nga agtatrabaho kadagiti online gambling companies iti pagilian iti ibilangda a “self-contained hubs” ta maikontra dayta iti karbenganda a nawaya a mapan kadagiti kayatda a pagturongan.

Impasingked ti PAGCOR a ti plano ket para ti proteksion dagiti Chinese workers nga agpapaay kadagiti e-gaming companies iti Pilipinas ta dagiti pakayakaranda a hub ket kompleto dagiti pasilidad ken establisimiento, ken ahensia ti gobierno kadagiti pakayakaranda a hub ket masaluadan ti seguridadda ta mayadayoda kadagiti krimen kadagiti kalsada.

Nabayagen nga impeksa ni National Security Adviser Esperon ti makapaalarma a kaadu ti bilang dagiti Chinese workers iti Pilipinas, ken dinillawna ti nalukay a panangipaay iti visa kadagitoy a ganggannaet no makasangpetdan iti Pilipinas. Impeksana pay a security risk ti pannakabangon ti POGO hub iti sigud nga Island cove resort iti Kawit, Cavite ta asideg dayta iti napateg a military installation.

Nagballaag met ti Philippine Navy iti plano dagiti Chinese investors a pannakabangon dagiti commercial industry kadagiti tallo nga strategic island iti Luzon: sadiay Fuga island, iti Amianan a paset ti Cagayan, ken sadiay isla ti Grande ken Chiquita iti Zambales iti Central Luzon. No matuloy nga agbalin dagitoy nga isla a maneharen ken kontrolen dagiti Chinese nationals ket dakkel a pangta iti seguridad ti Pilipinas ta addan baseda iti asideg ti mainland kalaksidan pay dagiti dinappatanda nga artipisial nga isla iti West Philippine Sea.

Napateg ti buis a makolekta ti gobierno kadagiti foreign investors kas ti China. Adu ti mapastrek manipud kadagiti e-gaming companies iti POGO ngem kaaduanna ket Chinese workers met dagiti mabenepisiaran. Naindaklan a panagdur-as ti maikarkari iti pannakapaprogreso dagiti isla ti Fuga, Grande ken Chiquita ta adda plano a mapagbalinda a kas ti Macau a nagbalin a sentro ti turismo ken sugal. Ngem apay nga ipalubos ti gobierno nga aramiden iti Pilipinas dagiti negosio a maiparit sadiay China?

Kasapulan ti gobierno iti ad-adu a buis manipud kadagiti nagduduma a negosio, ngem saan koma a maikompormiso ti seguridad ken pagimbagan dagiti Pilipino. Nasken a mabalanse koma ti ekonomia ken seguridad ti pagilian.