VIGAN CITY – Angayen ti gobierno probinsial ti Ilocos Sur Choir Competition iti Plaza Salcedo ditoy  inton Disiembre 21, 2007.

Kuna ni Gov. Deogracias Victor “DV” Savellano nga esponsoran ti gobierno probinsial ti nasao a pasalip tapno madiskobre ken maasa ti talento dagiti kumakanta iti probinsia ken maitandudo ti nabaknang a kultura dagiti Ilokano.

Dua a kategoria ti pagsasalipan: maysa iti para kadagiti agad-adal ken para kadagiti national, provincial ken municipal units ti sabali.

Masapul nga addaan tunggal choir iti saan a nakurkurang ngem duapulo a miembro ken saan a lumbes iti tallupulo.

Tunggal kategoria, umawat ti kampeon iti P30,000, P20,000 ti maikadua ken P10,000 iti maikatlo a puesto.  Maikkan  iti  P5,000 a pangliwliwa a gunggona dagiti amin a makipartisipar.#