Christmas Day explosion iti Luna compound, nainaig iti politika?

BANGUED, Abra – Aksidente a bimtak dagiti rebentador wenno adda pakainaiganna iti politika?

Dagitoy ti kitkitaen dagiti inbestigador a posible a motibo iti napasamak nga explosion iti uneg ti arubayan ni Diputada Cecilia Luna iti Barangay Dangdangla ditoy itay kaalda-wan ti Paskua.

Karaman dagiti tallo nga annak ni Luna, da Lagayan Mayor Jendricks Luna, 37, Dangdangla Barangay Chair-man Ryan Luna, 31, ken Cromwell Luna, 35, kadagiti pito a tattao a nasugatan iti panagbettak a pakaibilangan da PO3 Nathaniel Bermudez, Jodel Batul, Mario Blaza, ken Randy Viloria.

Naammuan iti report nga adda ti diputada ken sumag-mamano nga appona iti salas ti pagtaenganda idi napasamak ti panagbettak iti garahe.

Naipakni ni Luna iti maysa a safe house kalpasan ti panag-bettak para iti seguridadna.

Kinuna ni Chief of Police ditoy Senior Inspector Joseph Paolo Bayongasan nga agay-ay-ayam iti baraha dagiti biktima idi adda bimtak iti garahe.

Naitaray dagiti nasugatan iti P. V. Seares Hospial ditoy ngem naiyalis dagiti agkabsat a Luna iti maysa nga ospital iti Metro Manila.

Kuna dagiti polis a nadadael ti bubong ti garahe ken sumag-mamano a lugan a nakaparking iti asideg.

Madama ti panaguk-ukkon dagiti inbestigador no ania a banag ti bimtak.

Kabayatanna, kinuna ni Cordillera regional director Police Chief Supt. Eugene Martin a sirsirigen dagiti inbes-tigador  no rebentador wenno political rivalry ti nakagapu iti explosion.

Maipalagip a tinambang dagiti armado a tattao ti lugan ni Luna bayat ti kampania iti eleksion idi Mayo daytoy a tawen. Innem a lider ni Luna ti nagudas iti nasao a panag-tambang a nakairamanan ti kasinsin ti diputada.

Saan a nakasakay ni Luna iti lugan a mapapati a puntiria dagiti nagtambang.#