Footer

Citizens Charter, maipaskil kada opisina tapno mapukaw red tape: CSC director

VIGAN CITY – Tapno insigida a maited ti serbisio kadagiti tao no adda masapulda iti ahensia ti gobierno, kasapulan a maipaskil iti kada opisina ti Citizen’s Charter sakbay nga agtapos iti Disiembre daytoy a tawen, daytoy ti inwaragawag ti Civil Service Commission itay napan a lawas.

Iti interbiona iti maysa a lokal a radio station ditoy, kinuna ni CSC Vigan Field Office Director Hedy Lardizabal a babaen ti Citizen’s Charter, makita ti masurot a proseso iti panagala ti serbisio kadagiti opisina kas iti panangala iti birth certificate, marriage certificate, police clearance, business permit, driver’s license ken dadduma pay.

Kinuna ni Lardizabal a makita pay ditoy dagiti papeles a kasapulan nga ited ti kliente iti opisina, nagan dagiti empleado a mangasikaso, ti pagbayad, mano nga aldaw wenno oras ti panaguray, ken sadino ti pakasarakan kadagitoy nga opisina, kasano ti panangipila iti reklamo maipanggep kadagiti aplikasion ken dawaten manipud nagduduma nga opisina.

Segun ken ni Lardizabal, babaen ti Republic Act No. 9485 wenno Anti-Red Tape Act of 2007 daytoy kaadda ti Citizen’s Charter ket pukawenna dagiti ‘fixers’ agsipud ta  insigida a maited dagiti kasapulan dagiti tao.

“Nasayaat no adda maysa a manual a pakakitaan amin a serbisio iti kada opisina ti maysa a munisipio, wenno local government unit. Ket no saan a maited ti  masapul a dokumento iti maysa nga aldaw, mangted ti opisina iti surat iti panagsubli ti kliente,” kinuna ni Lardizabal idinto nga inyunay-unayna a  saan a rason ti lunch break ket masapul a maited ti kasapulan dagiti tao nga agur-urayen iti opisina.

Kinuna ti CSC director ditoy a mabalin ti kliente ti mangipila iti reklamo no saan a maipaay ti serbisio a namnamaenna nga ited dagiti empleado iti maysa nga opisina.

Mapapati a  sumagmamano nga empleado iti gobierno wenno dadduma pay a tao ti agpapaay a  ‘fixers’ para iti nadardaras a pannakaited dagiti masapul dagiti tao ngem agsingirda iti nangatngato ngem iti talaga a bayad ti dokumento.

Maikkat iti trabaho dagiti matiliwan nga empleado nga agkutkuti kas ‘fixers’, kinuna ni Lardizabal.

Impaulog metten ti  ti Opisina ti Presidente ti Administrative Order No. 241-A para iti nadaras a pannakaimplimentar iti nasao a linteg.