Footer

City gov’t, agproblema nga agkolekta iti amortisasion ti pabalay iti Shelterville

VIGAN CITY – Kaadduanna kadagiti agnaed iti maysa a housing project iti Barangay Capangpangan ditoy siudad ti  delingkuente iti panagbayadda iti binulan nga amortisasion ti balayda.

Daytoy ti impalgak ti dua  nga opisial ditoy siudad iti question hour bayat ti regular session ti sangguniang panlungsod idi Hunio 1.

Pinaayaban ti konseho ditoy  da City Administrator Milagros Alquiza ken ni City Social Welfare and Development Celerina Agcamaran tapno lawlawaganda ti sasaaden ti Shelterville housing project ti city government kalpasan nga inruar ni Konsehal Everin Molina nga adda problema iti panagkolekta iti binulan nga amortisasion dagiti benepisario ti nasao a proyekto ti pabalay ditoy siudad.

Idi napan a tawen, nagbalin a problema ti city government ti panagkolektana iti binulan nga amortisasion ti pabalay ket simrek iti katulagan iti Nueva Segovia Consortium of Cooperatives tapno daytoy ti agsingir kadagiti agnaed kadagitoy a housing unit.

Naammuan a gapu ta marigatan ti nasao a kooperatiba nga agkolekta iti bayad dagiti agindeg, iti city treasurer’s office ti pagbayadanen dagitoy iti binulan nga amortisasionda.

Kinuna ni Alquiza a marigatan ti kooperatiba nga agsingir iti binulan a P500 nga amortisasion dagiti house owners gapu ta kaaduanna kadakuada ti aggatgatang laeng iti botelia ken landok.

Kinuna pay ti city administrator nga uray dagiti sumagmamano nga empleado ti city government nga agnaed iti Shelterville ket marigatanda pay nga agbayad iti binulan a rebbengenda.

Nupay kasta, inlawlawag ni Alquiza a saan a dagiti naud-udi a benepisario ti nasao a pabalay ti yan ti problema ta nasayaatda nga agbayad no di dagiti immun-una a nakaiyawatan dagiti balay agsipud ta masansan a maladaw wenno saan a makabaybayad dagitoy.

Kanaig daytoy, nairekomenda ti panagbayad dagiti agindeg iti inaldaw tapno saanda a madagsenan wenno ti pannakaited iti diskuento kadagiti masapa nga agbayad.

Segun ken ni Agcamaran, iti agdama, iti kadagupan a 165 a housing unit a naipatakder iti babaen ti nasao a proyekto ti pabalay iti Shelterville,  addan 155 a benepisario nga agindeg ditoy idinto a 10 a balay ti awan pay nangukopar.

Babaen ti katulagan a nagpinnirmaan ti city government nga imbagi ni Mayor Eva Marie S. Medina ken ti Gawad Kalinga,  ti naud-udi ti nakaammo kadagiti material a naaramat iti pannakaipatakder dagiti balay, dagiti benepisario ti nangited iti libre a trabaho iti konstruksion dagitoy idinto nga indonar ti gobierno ti siudad ti daga a nakaipatakderan ti nasao a pabalay.#