Footer

Cityhood ti Narvacan, Cabugao, maipagpagna

VIGAN CITY – Adda posibilidad nga uppatton ti siudad iti probinsia ti Ilocos Sur gapu ta maipagpagna nga addang para iti cityhood ti ili ti Narvacan ken Cabugao.

Positibo ti nagbalin a reaksion ditoy ni Gobernador Deogracias Victor “DV” Savellano idi maala ti kapanunotanna mainaig iti daytoy a tignay ti dua nga ili.

“Baka saan laengen a dua ti siudad iti Ilocos Sur no di agbalin nga uppat.  Ti Narvacan ken Cabugao ket  isagsaganadan ti panagsiudadda,” kinuna ni Savellano bayat ti naangay a press conference iti provincial capitol itay nabiit.

 Kabayatanna, naammuan ken Mayor Edgar Zaragoza a kalikagumda nga agbalin a siudad ti Narvacan uray dumalan iti abut ti dagum iti panagsiudadna.

Addan naaprobaran a resolusion iti Sangguniang Bayan a mangikalkalikagum ken ni Deputy Speaker Eric Singson iti panangipilana iti maysa a gakat para iti panagbalin ti Narvacan a  maysa a component city.

Iti Resolution  No. 07-12, Series of 2007, dinakamat dagiti opisial a nagun-od ti Narvacan dagiti minimum requirements para iti  panagbalinna a siudad..

Maibatay iti resolusion, addaan ti Narvacan iti land area a 120.5735 square kilometers ken annual income a P70,401,360 kas maibasar iti napastrekna idi napalabas a tawen.

Kabayatanna, pinasingkedan ni sigud a gobernador Luis “Chavit” Singson nga adda addang para iti panagsiudad ti Cabugao.

“Manamnama ti panagbalin ti Cabugao a baro a siudad iti masakbayan nga aldaw,” kinunana.

Kangrunaan a rason a dinakamat ni Singson ti Salomague Seaport iti Cabugao.  

Kinunana a no malpas daytoy a puerto, manamnama nga adunto ti maparnuay a pagsapulan gapu iti pannakaipasdek dagiti negosio ken paktoria iti seaport.

Kinunana pay ni Singson nga adun ti nakapatpatangna a negosiante idiay Tsina nga adda paktoriana ket iti yaayda panagnegosio iti seaport, daytoyton ti panangrugi ti industrialization boom ti probinsia.