Civil mass wedding, naisayangkat

CANDON CITY – Kaadduanna kadakuada ti nabayagen a nagdenna ken addaan payen kadagiti annak, ngem gapu ta awan ti gastuenda, saanda pay a nagkasar iti simbaan wenno iti mayor.

Naikkaten daytoy a problemada agsipud ta naisayangkat ti civil mass wedding ditoy idi Septiembre 28 babaen ti initiatibo ti barangay captain ti Barangay Bagani Campo ditoy siudad tapno mapagbalin a legal ti panagdennada.

“Kayatmi a tulongan ida tapno agbalin a naragsak ken legal ti panagdennada,” kinuna ni Barangay Captain  Romeo Ramos bayat ti interbio kenkuana ti DZTP.

Ni Vice Mayor Alfonso Singson ti nangisuno ken ni Mayor Allen Singson a nangkasar kadagiti 31 nga asmang. Nagbalin met a ninong ken ninang dagiti city councilors ken ni Dr. Ericson Singson a nangibagi ken ni City Administrator Grace Singson.

“Napintas daytoy a programa ti Barangay Bagani Campo,” kinuna ni Bise Mayor Singson idinto nga innayonna a rumbeng laeng a tuladen daytoy dagiti dadduma a barangay a mangipaay iti libre a kasar kadagiti kabarangayanda tapno mapagbalin a legal ti panagdennada.

Kabayatanna, angayen met ti Vigan City government ti mass wedding inton Nobiembre 25 daytoy a tawen.

Ti Balikatan sa Vigan, grupo dagiti babbai ditoy siudad, Saint Paul Cathedral ken ti city government ti mangesponsor iti mass wedding para kadagiti agdendennan a residente ditoy siudad ngem saanda pay a nagkasar iti simbaan.

Indagadag ni  City Civil Registrar Susan Ancheta ti panagpalista dagiti maseknan tapno maisagana dagiti dokumento a kasapulanda para iti panagkasarda. Deadline ti registration inton Oktubre 31.

Tinawen nga angayen ti city government ken ti simbaan Katoliko ditoy babaen ti pannakikammayet ti Balikatan sa Vigan ti mass wedding para kadagiti agdendennan ngem saan pay a nagkasar iti simbaan. Libre ti kasar iti simbaan ket ti pay city government ti mangipaay iti pangngaldaw ken regalo babaen ti panangidaulo ni Mayor Eva Marie S. Medina dagiti konsehal a manganak iti kasar kadagiti agpasken.#