Clean up drive, naisayangkat iti igid ti baybay, kankanal

CANDON CITY – Nagtitinnulong dagiti naduma-duma a grupo a nangisayangkat ti panagdalus iti igid ti baybay ken kadagiti narugit a kanal iti wet market ditoy siudad idi Marso 9 ken Marso 12.

Nasurok 300 a partisipante a pakaibilangan dagiti kameng ti Ilocos Sur Instagrammmers Organization, Inc., NSTP students ti North Luzon Philippines State College (NLPSC) ken NICOSAT, Barangay Paypayad, ken Barangay Darapidap ti nakipagdalus iti igid ti baybay ditoy siudad idi Marso 9.

Sabali pay a grupo a pakaibilangan ti Citizens Involvement and Services (CIS), dagiti opisial ken agindeg iti Barangay San Isidro, ken dagiti empleado iti City Environment and Natural Resources Office nga indauluan ni Engr. Ismael Ganaban, ken dagiti adda iti wet market task force ti nagdalus kadagiti kanal ti wet market idi Marso 12.

Naisayangkat ti clean-up   kadagiti nadakamat a lugar tapno malapdan ti panaglayus maigapu kadagiti basura, kangrunaan iti selopin, styrofoam, plastic, lata, goma ken dadduma pay a di marunot a basura.#