Latest News: Clustered sanitary land fill dagiti LGU iti Ilocos Sur, insingasing ni Mayor Goulart | Tawid News Magazine - Weekly Ilocos News 📰

Clustered sanitary land fill dagiti LGU iti Ilocos Sur, insingasing ni Mayor Goulart

CAOAYAN, Ilocos Sur — Kasapulan ti pannakapaadda iti sanitary land fill para kadagiti clustered local government units dagiti ili ken siudad nga awanan iti tumutop a lugar a pagibellenganda iti basura tapno maaddaan iti long-term solution ti problema iti solid waste management.

Dayta ti insingasing ni Caoayan Mayor Germelina Singson Goulart kadagiti kameng ti Ilocos Sur Integrated Press iti naangay a Kapihan iti Amianan Media Forum tapno masulosionan ti parikut ti tumutop a pagibellengan ti basura iti ilida ken dadduma pay nga LGU iti Ilocos Sur nangruna iti Metro Vigan.

Impakaammo ni Mayor Goulart nga addan alikamen a nagatang ti municipal government a manggiling kadagiti dadduma a basura tapno dagiti laengen saan a marunot ti maibelleng iti dump site. Impannakkelna ti epektibo a pannakakolekta dagiti basura iti ilida uray kadagiti barangay iti ruar ti poblasion. Inlawlawagna nga agtultuloy met ti nainget a waste segregation kadagiti agindeg kadagiti marunot ken mabalin a ma-recycle tapno malimitaran dagiti makolekta ken maibelleng a basura.

Impakaammona ti kiddawna ken ni Ilocos Sur Governor Ryan Singson ti pannakapaadda koma iti sanitary land fill ti Provincial Government kadagiti ili nga addaan iti tumutop a lugar a mapagbalin a pagbasuraan dagiti LGU nga awanan ti mayanatup a pagibellengan ta uray no agbayadda iti dumping fee. Inlawlawagna a kas coastal town nga awanan iti kabambatayan a pasetna, kas kadagiti dadduma nga ili iti Metro Vigan area ket awanan ti ilida iti mayanatup a lugar a mapagbalin a sanitary land fill.

Impakaammo pay ni Mayor Goulart a nainget ti panagsagsagana ti municipal government iti idadateng ti didigra wenno kalamidad iti panawen ti panagtutudo. Impanakkelna nga aktibo ti Municipal Disaster Risk Reduction Management Office iti panangsanay kadagiti volunteers manipud kadagiti nagduduma a barangay. Impalgakna pay a nakagatangdan kadagiti nayon a behikulo a mausar no panawen ti didigra a pangarayat kadagiti agbalin a biktima.

Impalgakna pay nga addan nabangon a natalged nga evacuation center ti Caoayan a pagpaingan dagiti agbalin a biktima ti kalamidad tapno saanen a mausar dagiti eskuela ket saan maapektaran ti panagklase dagiti ubbing. Inlawlawagna a ti baro nga evacuation center iti likudan ti Rural Health Unit ket kompleto kadagiti pasilidad ken alikamen a mangakomodar kadagiti agpaing a kailianda no panawen ti didigra.

Impakaammona nga agtultuloy a pagam-amkan dagiti umili iti Caoayan iti layus no napigsa ken napaut ti tudo ta mabalin a malapunos ti Meztizo River ken Abra River gapu ta narabawdan. Indariragna a kasapulanen ti pannakakutkot dagiti dua a karayan wenno river dredging tapno malapdan ti layus iti ilida. Inlawlawagna a nakaro a layus ti lak-amen ti ilida no saan a makutkotan dagiti dua a karayan a lumabas ken rummuar iti kabaybayan ti Caoayan.

Iti pakaseknan ti salun-at, impalgakna a maysa ti ilida nga adu dagiti nagbalin a biktima ti dengue, isu nga ikagkagumaan ti municipal government, RHU ken dagiti barangay opisial ti mangisaysayangkat kadagiti dengue prevention programs kangrunaanna ti panagdaldalus kadagiti pagtaengan ken arubayan tapno mapukaw dagiti pagitlogan ken pagbalayan ti lamok nga agiwaras iti sakit.

Nagapila kadagiti umili iti tulongda ta saan a mabaelan ti lokal a gobierno a lapdan ti sakit ti dengue no saan a makikaysa dagiti umili iti Caoayan iti panagdaldalus. Kiniddawna ti pannakikaysa dagiti amin nga opisial ken umili iti pannakaipatungpal ti Executive Order No. 23 ni Gov. Singson tapno malapdanen ti umad-adu a bilang dagiti kaso ti dengue a nangkettelan iti pito a biag ken addaanen iti nasurok a 2,500 a kaso ita tawen. ●