Cobangbang, Savellano, agpailayonda a mayor, bise mayor

CABUGAO, Ilocos Sur – One Cabugao ti impamatmat ti bunggoy ni Mayor Edgardo S. Cobangbang, Jr. idi napanda nagipila iti kandidaturada iti Comelec office ditoy idi Oktubre 16.

Immuna a nakimisa ti grupo iti mismo a simbaan ditoy, ket kalpasan ti pammigat, nagturongda iti Comelec office sada nagipila iti kandidaturada.

Agpada da Cobangbang ken ni Vice Mayor Deogracias Jose Savellano nga agpailayon iti puestoda.

Ninamnama dagiti supporters ni Cobangbang nga awan ti tumakder a sumango iti mayor ngem iti maudi a kanito, nagipila ni dati a Municipal Health Officer Dr. Rudy Singson iti kandidaturana para mayor iti daytoy nga ili.

Maipalagip a naikkat ni Singson iti puestona gapu kadagiti complaint a naipila maikontra kenkuana bayat ti administrasion ni Cobangbang.#