: Codicil | Tawid News Magazine - Weekly Ilocos News 📰

Codicil

Kolum: Iti Duyog ti Singasing

Ni Jaime M. Agpalo, Jr.

 (Maikatlo a paset)

 

 

Naobserbaranmi a nagrigat gayam ti biag ti padi wenno  estudiante iti kinapadi. Minor seminary pay laeng dayta, anianto la ketdin iti major! Di nakarkaron iti panawen a pannakatingiting ti konsiensa, a nawaya a mangibulos iti amin a kayat nga aramiden?

No mautob latta ti estudiante ti panagserbi ken panagsakripisiona, agsubli iti seminario ket ituloyna ti essemna; no agbaliw ti panunotna, saanen nga agtuloy pay.

Dagiti laeng napinget iti awag nga agserbi ken agsakripisio ti makapagpadi. Agsakripisio, dayta ti kaimudingan ti kinapadi Katoliko. (Agsaoak laeng iti maipapan kadagiti padi a Katoliko).  Sakripisio a biag. Naindaklan a sakripisio.

No kayat a suroten ti desdes a nagnaan ni Apo Jesus, maitutop nga agsakripisio, ta uray isu a mismo ket nagsakripisio iti iyaayna iti lubong, nagrigrigat, natay idi nailansa iti krus. Nagbiag a nakurapay ngem natalinaay. Nanumo ken napakumbaba.

No masurotan ti desdes a nagnaan ni Apo Jesus, makuna nga ammom ti kaipapanan ti Dalan, ti Pudno ken ti Biag. Dayta ti taluntonen a dana. Dayta ti dana a taltaluntonen dagiti padi. Dayta ti dana ti panagsakripisio. Dayta ti kaindaklanan a dana.

Dayta kadi ti dana a kayatmo?

Dagiti sipupuso nga umawat itoy ket awanen ti sabali a pakaiturongan ti imatangda wenno konsentrasion, sakripisio lattan. Ta maysa a sakripisio ti biag dagiti padi. Panangidaton ti bagi ken biag iti panagserbi. Saan a magatadan ti biag dagiti padi ta naisangsangayan. Naindaklan, idatonnan ti biagna ken aminna ken Apo Jesus, isuna laeng..

Inton agretiro, ta agretiro met uray padi, agsubli iti pamiliana, no adda pay sublianna a pamilia wenno adda sidadaan a mangpasangbay kenkuana; no awan met, agtalinaed kadagiti home for the aged a para kadagiti nataengan a kameng ti kongregasion wenno simbaan, agtultuloy sadiay ti inna panagsakripisio agingga a maawagan iti beddeng ti panungpalan.

Nakasaksikayo kadin iti panagpakada ti agretiro a padi?

Napadasakon. Nasaksiak iti panagpakada ti lakay a padi iti Our Lady of Atonement Parish (ti Baguio Cathedral). Uppat a pulo a tawen kano a nagserbi iti simbaan. Nagsangit iti panagpakadana. Makaterred lua. Makaiyagus rikna a panagpakada. Nagsangsangit iti inna panag-homily. (Sapay no di addaak iti makinsango a pew ken narabaw unay ti mumulagatak.) Agsangsangit ngem umis-isem. Nagsangit ta saan kano a malidayan no di ket maragsakan unay ta dimtengen ti panawen a pannakakissay ti panagsakripisiona. Maksayanen ti kinadagsen ti aw-awitenna a krus. Aginana ngarud iti serbisio, di maksayanen iti resposibilidad kadagiti parishioners?

Ala, nalaglag-an ketdi daytan a panagsakripisio ta saan a literal a nagawit iti krus kabayatan a masapsaplitan, matuptupraan, malalais, makatkatawaan, makoronaan iti siit, maidugmam, mailansa iti krus, maibayog, maduyok iti pika ti bakrangna ket ditan a maugotan iti anges a nakakaasi; wenno dagiti kas iti nagsakripisio a natay, pinapatayda iti ayatda a panangiwaragawag iti Sao ti Dios iti amin a suli.

Ita saludsodek met kenka, kayatmo ti agpadi? Wenno kabaelam ti agpadi? Baka kabaelan ta panunotmo ken riknam, ngem saan ta bagim, ta narasi ti bagi, nalaka unay a marsaak kadagiti pakaikursongan a basol.

Adu ti naayaban nga agpadi, ngem manmano ti nagtungpal; dagiti nagtungpal, addaanda iti sabali a dana ti biag isu a saanda a nakapagpadi; dagiti dadduma, saanda a nakaanus (kunata lattan) nga agsakripisio; dagiti dadduma pay, dagiti nagannak wenno kameng ti pamilia ti nangiduron kadakuada nga agpadi, ngem iti agbayag, matakuatanto met laeng dayta ket saandaka met laeng a palubosan nga agtuloy ta makitada, madlawda a saanka a naragsak.

(Maituloyto)