: Codicil | Tawid News Magazine - Weekly Ilocos News 📰

Codicil

Kolum: Iti Duyog ti Singasing

Ni Jaime M. Agpalo, Jr.

 (Maikadua a paset)

 

Ngem saan a siak ti nakatoka a mangsurat kadagitoy a drama idi un-unana, no di laeng ti agpakatawa, mangray-aw, agpasangit, mangbutbuteng, mangbagbaga ken dadduma pay a drama. a mangipaay iti adal ken sursuro.

Napaliiwko nga aburido a kanayon ni mannurat itoy nga agikamakam, ni Johnny Alasaas a taga-Vigan. Idi nauman, inyawatnan kaniak tapno siak ti mangsurat, lalo iti “Biag ni Jesus” a maadaw iti missal sheet wenno iti maibasa nga ebanghelio iti Domingo.

Ket naaronan wenno naibuang ti siguden nga adda a nakadulin iti katukottukotan iti panunottayi ken naglabasan wenno nagnaan iti biagtayo. Adda pangdutdotan a nakaisuksokan dagiti suraten itoy  wenno addada a naitalimameng iti kaunggan; in short, adda eksperiensatayo, isu a saantayo nga agdadamo, saantayo nga agar-arikap no sadino ti pangbag-otantayo iti topiko; kangrunaanna, no kasano ti agiyaplay iti interpretasion nga umayon iti pannursuro a Katoliko.

Iti bukodko a kapanunotan, nalaka a suraten dagiti religious program, ta iti panagubing ken kinaagtutubotayo, namulitayo itoy aspekto. Lalo idi agbasbasatayo iti sekundaria, nga inaldaw ti panangilawlawag ti passage of the day, wenno gagangay a naadaw iti daily readings iti biblia, ket no addaanka kadagiti librito (pamphlets) maipapan itoy (adu ti lako itoy agraman pannakailawlawagna ken aplikasionna iti panagbiag; saan laeng a kadagiti babasaen dagiti Katoliko no di uray kadagiti sabsabali pay a relihion ken sekta pammati; no mannuratka, nalaka laeng ti mangaramid iti bersion wenno mangpuligos wenno mangadaptar wenno aggapu iti mismo a padas, padas ti sabali, napaliiw, nangngeg, nabasa ken dadduma pay a source.)

Dayta ti biddut dagiti immuna a nagsursurat itoy ta nasken nga urayenda ti pannakaiprinta ti missal sheet, mangaramidda iti script, sa ti recording ken dubbing ket pitsidon ti orasda wenno magabay no di man nakusel no dadduma.

Idi naiyawat kaniak dagita a religious drama, inaramidko a dagus para iti dua a bulan dagiti religious program tapno saan a pitsido ti recording ken dubbing. Ta ngamin iti nakairuamandan a sistema: imbes nga aginana iti Domingo dagiti drama talents, inkapilitan nga agtrabahoda ta ikamakamda ti recording ken dubbing dagiti religious programs.

Ket nasdaaw ngata ti madre no apay a nasuratko. Ken pudno kadi dagiti insursuratko?

Napal-idan la ket ngarud ti kimmotko a nangiparang kadagiti prueba. Impakitak met ti dakkel a libro nga Iloko a pakaadawan iti misa iti uneg ti tallo a tawen. Ken no sadino ti posible a pangadawan kadagiti reference. Adda kaniak daydiay a libro nga Iloko ta debosionada ti baak nga ikitko ken ti adiek a balasang; imbagak pay a maysaak nga estudiante idi hayskulak iti Narvacan Catholic School, miembro iti choir iti simbaan, pasaray agsakristan iti misa, iti naminsan nagessem pay nga agpadi. Adda daydi panawen a kinuyognakami (dosekami) idi ni Fr. Santos Rabang, a kura paroko iti Bangued, Abra (masansan a dumagas iti NCS, sakbay a naiyalis sadiay Magsingal) iti Minor Seminary idiay Vigan a kas student-observer: agobserba, pangtingitingan, panglinayan ti essem nga agpadi. Madlawmi idi nga ob-obserbarennakami ti padi a rector idi iti Minor Seminary. Kalpasan ti dua a lawas, nagsublikami iti NCS.

Kayatyo pay ti agpadi? dinamag ni  Sis. Maria Fierra Solis, OSS, a sister principal ti NCS, kadakami a nagobserba.

Sangsangkamaysakami a nangibaga iti saanen. Wen, uray no saanen!

(Maituloyto)