Footer

Color coding dagiti bilog, mayimplimentaren: BFAR

BANTAY, Ilocos Sur – Mayimplimentaren ti color coding dagiti bilog kadagiti coastal municipalities, segun iti maysa nga opisial ti ahensia a akinrebbeng iti panagkalapan ditoy probinsia.

Kinuna ni Benedicto Saraos, agdama a regulating officer iti Provincial Agriculture Office, Fishery Sector, a marugian a mayimplimentar sakbay ti panaggibus ti tawen ti color coding kadagiti bilog ket naan-anayton ti implimentasionna iti sumaruno a tawen.

Kangrunaan a panggep implimentasion ti color coding dagiti bilog kadagiti nadumaduma a coastal towns iti probinsia tapno malapdan ti illegal a panagkalap.

Sagudayen ti maysa nga ordinansa nga inaprobaran ti sangguniang panlalawigan, masapul a mapintaan dagiti bilog iti maris a pili dagiti akinsakup a lokal nga agtuturay.

 Dagiti bilog tunggal munisipio ket adda naituding a kolorda a maigidiat iti kolor dagiti bilog iti sabali nga ili.  Maikkan pay dagiti bilog iti numero tapno adda pakaammuan no asino ti akinkukua iti daytoy.

Kinuna ni Saraos nga  ikamkampaniada pay ti Executive Order 305 a nangituding iti pannakairehistro dagiti bilog iti munisipio.

Inlawlawag ni Saraos a ti munisipion ti akinsaklaw iti pannakairehistro dagiti bilog, saanen a kas iti napalabas a ti coast guard ti akinrebbeng iti daytoy.

“No addan color coding,  maliklikan ti tinnudo iti illegal fishing ta mabigbigen ti ili a naggapuanna kas maibasar iti maris ti bilog,” kinuna ni Saraos.

Kinuna ni Saraos a napandan iti agarup kaguduan iti 18 a coastal municipalities ti probinsia tapno ilawlawagda daytoy a paglintegan.#