Color coding kadagiti ili, naindagadag a mayimplimentar

SANTA, Ilocos Sur – Indagadag ni Mayor Jeremy Jesus Bueno III ti pannakaiyemplementar ti color coding ti bilog kadagiti nadumaduma nga ili tapno malapdan ti panagkalap iti illegal a wagas.

Iti interbiona iti DZTP Radio Tirad Pass ken Tawid News Magasin itay nabiit, indagadag ti pannakaipakat ti color coding kadagiti nadumaduma nga ili agsipud ta maseknan ti Santa a maysa a coastal municipality.

“Uray makuna nga awan ti agbongbongbong iti ilitayo, adda dagiti sumsumrek a mangngalap a di ammo nga ili ti naggapuanda agsipud ta awan ti pakabigbigan a kolor ti bangka nga aramatenda,” kinuna ni Bueno.

“Tapno makontroltayo ken maiwayat ti seguridad dagiti mangngalap iti baybay, napintas no adda color coding amin a bilog kadagiti ili tapno mabigbig dagiti aglablabsing iti coastal laws,” innayon ti mayor.

Inlawlawag ni Bueno a daytoy a dagadagna ket mainaig iti ordinansa a naanamongan iti Sangguniang Panlalawigan ti Ilocos Sur babaen ti panangilungalong idi ni Vice Governor Jerry Singson.

“Napintas no adda color coding tapno makapagsasarita dagiti mayor kadagiti maseknan nga ili ket maikkanda iti solusion daytoy a problema,” kinuna ni Bueno. (Danny Antalan)