Committee on Heritage Conservation, naisingasing a mabuangay

VIGAN CITY – Naisingasing bayat ti session ti sangguniang panlungsod ditoy siudad ti pannakabuangay ti kabarbaro a komite tapno ad-adda pay a maitag-ay ti development daytoy siudad.

Insingasing ni Konsehal Ramil Arce, chairman ti committee on rules, ti pannakabuangay ti committee on heritage conservation agsipud ta karaman daytoy iti seven pillars of development daytoy a siudad.

Segun ken ni Arce, limtuad ti kinapateg daytoy a komite iti naangay nga strategic planning workshop a dinar-ayan dagiti agtuturay ti Vigan ken dagiti dadaulo dagiti nadumaduma nga opisina wenno ahensia iti siudad.

Nupay naisingasing ti panagbalin daytoy nga espesial a komite, napag-aanamongan idi agangay nga agbalin daytoy a maysa a regular standing committee ket adda mabutosan a chairman, vice chairman ken miembro.

Maipalaon daytoy a kas paset ti natratar nga internal rules and procedures ti sangguniang panlungsod.#