Cong. Eric, Ronald, nagiwarasda farm equipments

CANDON CITY – Kas suportada kadagiti mannalon iti sanguanan ti mapapati a panagkirang ti bagas iti pagilian, nagiwaras ni Congressman Eric Singson ken Cong. Ronald Singson  kadagiti farm equipments para kadagiti mannalon iti ibagianda a distrito.

 

Nagiwaras itay nabiit ni Dip. Singson kadagiti water pumps ken kuliglig para kadagiti nadumaduma a barangay ditoy siudad.

“Suportarantayo dagiti mannalon babaen dagitoy agricultural equipments tapno ad-adu ti maapitda,” kinuna ni Singson.

Kinuna ni Singson a naiyawat dagiti nasao a ramit-talon kadagiti kapitan ti barangay tapno isuda ti mangaywan.

Sangsanguen ita ti pagilian ti panagkurang ti bagas gapu ngumatngato a demanda iti daytoy a taraon iti world market.

Itay nabiit, kellaat a ngimmato ti presio ti bagas ditoy pagilian ket nasuroken P1,200 ti maysa a sako ti komersial a bagas.

Saan a daytoy ti umuna a gundaway a nagiwaras ti Singson iti farm equipments nga agpaay kadagiti barbarangay iti segundo distrito ti Ilocos Sur.

Kabayatanna, nangted ni Congressman Ronald Singson iti saggaysa a milion para iti munisipalidad ti San Ildefonso ken Caoayan itay nabiit.

Kinuna ti diputado a maaramat dagiti pundo para iti pannakaitandudo ti One Town One Product ti San Ildefonso ken iti pannakatarimaan ti municipal building ti Caoayan.

Naikkan pay iti P1 milion ti Nueva Segovia Consortium of Cooperatives a maisangrat para kadagiti livelihood projects ti nasao a kooperatiba.

Nagiwaras met ni Congressman Ronald Singson kadagiti bomba ti danum para kadagiti 25 a gunglo dagiti mannalon iti Siudad ti Vigan ken libro para kadagiti Day Care Centers iti umuna a distrito ti probinsia.

Inkari pay ti agilinlinteg a mangted iti P5 milion ket makaammon ti gobierno ti siudad a mangaramat iti daytoy iti prioridad a proyektona

Iti interbiona iti lokal a radio ditoy, kinuna ni Mayor Eva Marie S. Medina a maysa kadagiti proyektona ti pannakaipatakder iti kanayonan a pasdek ti Vigan East National High School.

Kinuna ti mayor a dimmakkel ti populasion ti nasao a pagadalan ket kasapulanna ti ad-adu pay a kuarto.#