Cong. Singson, inaminna ti drug possession, saan a trafficking

VIGAN CITY – Panagikut iti droga ti inamin ni Cong. Ronald iti korte ti Hong Kong, saan a drug trafficking, daytoy ti panangilawlawag ni Gov. Luis “Chavit” Singson iti kaso ti anakna a ni Cong. Ronald Singson.

“Inaminna nga adda kenkuana (ti droga) ngem saanna nga inawat a drug trafficking,” kinuna ni Singson.

Kinuna pay ti gobernador a dakkel ti nakagin-awaanda ta saan a kinansela ti Hong Kong court ti piansa ti anakna idinto a ti normal a proseso ket makansela ti piansa ket agsubli ti diputado iti pagbaludan agingga iti naituding a hearing ti kasona.

“Iti saan a pannakakansela ti piansana, kayatna a sawen a napalag-anan ti kaso,” kinuna ti gobernador.

Idi Agosto 19 idi napan a tawen, impalubos ti Tsuen Wan Court nga agpiansa ni Singson iti HK$2 million (P11 milion) para iti temporario a pannakawayawayana.

Nupay kasta, imbilin ti korte nga isuko ni Singson dagiti dokumento ti panagbiahena ken iti panagreportna iti inaldaw iti North Point Police Station iti nagbaetan ti 6 p.m. agingga iti  9 pm.

Kinuna ni Gov. Singson a marugian ti hearing inton Enero 26 ket mangnamnama a malpas daytoy iti mabiit tapno makaawid metten ti anakna.

“Bareng no tuloytuloyen… ket napintas ti pagbanaganna,” kinuna ni Singson.

Tiniliw dagiti otoridad ni Singson iti Customs arrival hall ti Hong Kong International Airport gapu iti mapapati a panangiserrekna iti 26.1 grams a cocaine ken dua a tablets ti Valium.

Ngem kalpasan ti saan a pannakairaman ti botelia a nakaikabilan ti droga, naipababa ti kantidad daytoy iti 6.6 grams.

“Napintas a senial daydiay saan a pannakaikkat ti piansana,” kinuna ni Singson idinto nga innayonna a ti pagdanaganna amangan no agballatek ken ni Diputado Singson ti napasamak iti Luneta a pannaka-hostage dagiti turista nga Intsik a nakatayan ti sumagmamano kadakuada.

Idi Agosto 23, 2010, hinaydiak ni  nadismis a polis Rolando Mendoza ti tour bus a naglugan dagiti 25 a tattao a pakairamanan ti 20 a turista manipud Hong Kong, ken 4 a Filipino tapno makasubli iti puestona.

Kalpasan ti pannakapaay ti nasurok sangapulo oras a negosasion, walo a hostages ti natay ken siam dagiti nasugatan.

Nairaman met a nagudas ti hostage taker.#