Cong. Singson, naglusulos a diputado iti umuna a distrito

Pormal a naglusulos idi Marso 1 ni Diputado Ronald Singson a kas pannakabagi ti first district ti Ilocos Sur kalpasan a sinentensiaan ti Hong Kong court a mabalud iti makatawen ken innem a bulan gapu iti panagikutna iti maiparparit a droga.

Mismo a ni Gov. Luis “Chavit” Singson nga amana ti nangiyawat iti surat a nakailanadan ti panaglusulosna ken ni House Speaker Feliciano Belmonte.

“Aglusulosak saan a gapu ta agtamedak iti pressure dagiti naariwawa a sumagmamano kadagiti honorable a kabaddungalak. Ti panaglusulosko ket panangtungpalko iti karik iti amak (I am resigning not because I am succumbing to the pressure of the noisy few among my honorable colleagues. My resignation is a fulfillment of my promise to my father),” kinuna ni Singson iti resignation letterna.

“Iyawatko ti panaglusulosko kas congressman para iti pagsayaatan dagiti kailiak, dagiti umili a Filipino, kangrunaan dagiti constituentko iti umuna a distrito ti Ilocos Sur, a tumangtangad kadagiti kameng ti Kongreso nga addaan respeto nga aglikig pay iti adulasion, ken iti saan a matay a namnama para kadagiti pudpudno nga honorable nga agilinlinteg kas pagwadan iti kangatuan a pagbatayan iti kaugalian ( I am tendering my resignation as a congressman for the sake of my countrymen, the Filipino people, especially my constituents in the first district of Ilocos Sur, who look up to the members of Congress with respect bordering on adulation, and with undying hope for truly honorable legislators as exemplars of the highest standards of behavior),” kinuna ti surat.

Pinasagidan pay ni Singson dagiti kabaddungalanna nga agilinlinteg a nangidarirag iti panaglusulosna bayat ti pannakausigna idinto a kinunana a “…kadagitoy mapagduaduaan a tiempo a marukod ti pudno a kapateg dagiti gagayyem, saan nga iti alimpatok ti kinabileg, inpluensia wenno kinabaknang.”

Iti immun-una nga interbiona iti DWRS, impalgaken ti laklakay a Singson a nagpatangandan iti anakna a diputado ti panaglusulos daytoy iti puestona ngem kalpasan ti pannakalpas ti kaso tapno saan a makadadael iti depensana.

“Idi pay laeng manarimaan ti kaso, napagpatanganmin dayta,” kinuna ti gobernador idinto nga innayonna a nadakamatna daytoyen ken ni House Speaker Belmonte.

Impetteng pay ti gobernador a naset-up ti anakna ngem agsipud ta naala dagiti droga iti ikut daytoy, kapilitan nga immamin iti drug possession.

Kinuna pay ni Singson a pagsayaatan ta namati ti hues a saan a para lako ti droga a naala dagiti autoridad iti ikut ti diputado no di ket para iti bukodna a panangaramat isu a nalaglag-an ti naipataw a sentensiana.

Nasentensiaan ti ub-ubing a Singson iti makatawen ken uppat a bulan gapu iti panagikutna iti cocaine ken sabali pay a dua a bulan gapu iti panagikutna iti Nitrazepam wenno Valium.#