Consortium ti kooperatiba, Vigan city gov’t, agtintinnulong mangipaay loan assistance

CAOAYAN, Ilocos Sur – Agtultuloy ti panagtinnulong ti Nueva Segovia Consortium of Cooperatives ken ti gobierno ti Siudad ti Vigan a mangipapaay iti livelihood assistance kadagiti babassit a negosio iti Metro Vigan.

Kinuna ni Manager Divina Quemi a pagkinkinnamayetan ti Vigan City government nga idadauluan ni Mayor Eva Marie S. Medina ken ti NSCC a mangipaay iti pautang kadagiti micro entrepreneurs, mannalon ken mangngalap para iti pannakaidur-as iti produktoda.

Karaman kadagiti papautangan ti NSCC dagiti agar-aramid iti bagnet, longganisa, imbutido, empanada ken dadduma pay a babassit a negosio kasta metten dagiti mannalon ken mangngalap tapno mapasayaatda pay dagiti produktoda.

Idi Disiembre itay napan a tawen, immawat ti NSCC iti pammadayaw a maysa kadagiti 10 Most Outstanding Community Enterprises nga impaay ti Villar SIPAG Awards for Poverty Reduction nga immawatanna iti P250,000.00.#