COP, naupay iti pannakadismis kaso kontra drug personality

VIGAN CITY – Impeksa ni COP Police Chief Inspector Maximo Taclas ti pannakaupayna gapu iti setback a sinagrap ti kapolisan ditoy iti nainget a kampaniada maikontra iti droga iti pannakadismis ti kaso nga impilada maikontra iti maysa a drug personality ditoy.

“…Makaupay kaniami,” kinuna ni Taclas idinto nga inyunay-unayna a nagrigatda, nagsakripisioda iti oras ken kuarta tapno laeng matiliw ni Zamora(ket) “kalpasan a maipila ti kaso iti korte, madismis met laeng”.

Tiniliw dagiti polis ni Arnold Zamora, mapapati a drug personality ditoy siudad , babaen ti maysa a buy-bust operation nga insayangkat dagiti polis idi Marso 7 ket naipila ti kaso iti kabigatanna.

“Maysa a buy bust operation (ti naaramid), nagusarkami iti marked money, nagusarkami iti assetmi a dida am-ammo… nakarigrigat ti surveillance a trabaho ket naisiutmi daytoy a tao, naikornermi, ngem kunada met, saan kano nga admissible dagidiay ebidensiami… ania ngarud, saankami met nga abogado,” inlagidaw ni Taclas. 

“Siguro, agbasakami iti Law tapno kasta, agpaparehaskami a lawyer tapno ammotayo ti nasayaat nga aramiden,” kinuna ni Taclas idinto nga indagadagna ti panagtitinnulong dagiti amin a maseknan iti criminal justice system tapno “mapagtalnatayo daytoy a problema.”

“… No awan ti mangtulong kadakami, kakaasikami nga agtrabaho, kalpasanna, madismis met laeng ti kaso, awan ti pagbanaganna daytoy a problema,” kinuna ti hepe ti polis.

Ngem iti baet ti setback a sinagrap ti kapolisan iti kampaniada maikontra iti droga gapu iti pannakadismis ti kaso ti maysa a drug personality ditoy, sabali pay a lalaki ti tiniliw dagiti polis itay nabiit gapu iti mapapati a panagikutna iti shabu.

Agpatpatrolia iti alas onse ti rabii dagiti polis nga indauluan ni SPO4 James Jara idi masalamaanda ni Gilbert Guillen, 39, residente iti Puerto Real, Sto. Domingo, Ilocos Sur iti sanguanan ti pagtaengan ti maysa a drug personality ket inasitganda gapu iti suspetsoso a tignayna.

Nasiputan dagiti polis nga adda intinnag ti suspetsa ket idi pidutenda, naduktalanda a maysa a plastic sachet a naglaon iti mapapati a shabu.

Kinuna ni Taclas nga iti baet ti setback a sinagrapda iti pannakadismis ti kaso ni Zamora, itultuloyda ti nainget a kampaniada maikontra iti maiparparit a droga.#