Corn husk production, nairusat iti Candon City

CANDON CITY – Daytoy siudad ti nakairusatan ti corn husk production tapno matulongan dagiti babbai ditoy iti pamataudan ti pamastrekanda.

Kinuna ni Trining Reyes ti city agriculture office nga inyusuat ti Department of Trade and Industry ti corn husk production babaen ti lima nga aldaw a training-seminar para iti panagpartuat kadagiti produkto  manipud iti ukis ti mais.

Innayon ni Reyes a pinili ti DTI ti Candon City a pakairusatan ti nasao a programa ta kayatna a tulongan dagiti babbai nga agnaed ditoy nga adda pamataudanda iti livelihoodda kabayatan ti panangbantayda kadagiti ubbingda nga agbasbasa, panagbuyada iti telebision wenno panaginanada iti malem.

Babaen daytoy a programa, maisuro kadagiti babbai nga agaramid iti sabong, tsinelas, bag ken dadduma pay a produkto manipud iti ukis ti mais.

Kinuna met ni Jacinta Ubiles, trainor, ken presidente ti Magsingal Corn Husk Crafter Association, Inc., nga adu dagiti produkto a mabalin a mapartuat iti ukis ti mais a mangipaay iti pamastrekan kadagiti babbai.

Innayon ni Ubiles a daytoy ti One Town One Product ti ilida a Magsingal, ket makadanonda kadagiti nadumaduma nga ili iti probinsia nga aggatang iti ukis ti mais agsipud ta dakkel ti demand kadagiti produkto a maaramid manipud kadagitoy.

Impalgak ni Ubiles a magatang iti P2 tunggal metro ti nalubid nga ukis ti mais ken P10 tunggal metro ti nalaga.

“Iti pannakipartisiparmi kadagiti trade fair, adda nag-order kadakami iti 2,000 a rolio ti rickrack (nalaga), 50 metro ti tunggal rolio, ket gatangenda iti P10 tunggal metro, kinuna ni Ubiles.”

Kinuna ni Ubiles a dakkel a pamastrekan dagiti babbai ti panagaramid iti produkto manipud iti ukis ti mais agsipud ta dakkel ti demand iti daytoy nga industria, nangruna no masurot ti pagannurotan ti DTO.#