Corn husk weavers association, agtultuloy maikkan suporta

MAGSINGAL, Ilocos Sur – Agtultuloy ti suporta ti lokal a gobierno iti asosasion dagiti agar-aramid iti produkto manipud iti ukis ti mais ditoy nga ili.

Kinuna ni Mayor Alrico Favis a malaksid ti panangipaay ti gobierno munisipal nga idadauluanna iti tulong a pinansial iti Corn Husk Weavers’ Association, maangay pay dagiti pasanay wenno training dagiti kameng tapno mapasayaat ken mapapintasda ti kalidad dagiti produkto a partuatenda manipud iti ukis ti mais.

Tumulong pay ti lokal a gobierno iti pannakaipromot ken pannakailako dagiti produkto a partuaten ti nasao nga asosasion babaen ti pannakipartisiparda kadagiti trade fair, segun iti mayor.

Ti panagaramid kadagiti produkto manipud iti corn husk ti one-town-one product ti gobierno munisipal ditoy nga ili.#