Footer

Cosmetic products dealer, nabiktima iti P200,000

SAN FERNANDO CITY- Maysa a dealer iti cosmetic products ti linoko ti maysa a grupo a nagpammarang a mangisursuro a nakapukawanna iti nasurok P200,000.

Nagpulong iti polis ni Rosalie Bugayong-Baltazar, 43, Avon dealer ken residente ti Pagdalagan Norte, ditoy siudad a peke dagiti tseke nga impasupli kenkuana ti maysa a grupo a nagpammarang a mangisursuro iti maysa a pagadalan iti elementaria iti kaparanget nga ili daytoy a siudad nga aggatad amin iti nasurok P200,000.00.

Segun iti biktima, simrek iti paglakuanna dagiti walo a suspetsa a pasig a babbai, nagpammarangda a mangisursuro ket gimmatangda kadagiti cosmetic products nga aggatad iti P39,723.00.

Sangapulo ket siam a tseke ti pinagbayad dagiti suspetsa iti biktima nga aggatad amin iti P212,936.00.  Agdagup iti  P173,213.00 ti insupli ti biktima kadagiti tseke.

Naduktalan ni Bugayong nga awan pondo dagiti tseke idi ipasukatna dagitoy iti Land Bank of the Philippines ken Veteran’s Bank ken peke gayam dagitoy idi iberipikana iti DepEd Division Office.

Nupay napirmaan dagiti tseke, mapapati a palso a nagan dagiti naaramat.#