Footer

Covered court, nabendisionan

SAN EMILIO, Ilocos Sur – Saanen a mainitan dagiti agbasbasa iti panagklaseda iti Physical Education ta nalpasen ti covered court a naipatakder iti uneg ti national high school ditoy.

Karaman a nabendisionan ti nasao a covered court iti pannakaselebrar ti maika-33 Foundation Day ti San Emilio National High School idi Abril 4.

“Ita, aginit man wenno agtudo, mas komportablen dagiti ubbing nga agadal,” kinuna ni Maribel Agsano, head teacher ti pagadalan.

Kinuna met ni Mayor Ferdinand Banua, ti dagus a pannakaipatakder ti pasdek ti mangipaneknek nga asideg ti San Emilio iti puso dagiti opisial ti probinsia.

“Ngarud, masapul nga ipakitatayo met ti suportatayo ken ni Gov. Luis “Chavit” Singson tapno lalo pay a mapasayaatna ti panagserbina iti sibubukel a probinsia,” kinuna ti mayor.#