Crime group, PAGs iti rehion, simmuko: PNP reg’l director

CAMP BGEN OSCAR M. FLORENDO, SAN FERNANDO CITY, La Union – Inwaragawag ti PNP regional director ditoy a nagsaruno a simmuko dagiti mapapati a lider ken miembro dagiti armado a grupo idi Enero 24 ken 25.

Kinuna ni Police Chief Supt. Ricardo Marquez, PRO 1 director, a simmuko dagiti dadaulo ken miembro ti Gomez-Cachola Crime Group ken ti Abiang Group agsipud iti agtultuloy ken nainget a panangmonitor ti Regional Intelligence Division, ti Ilocos Sur Police Provincial Office ken ti Regional Special Operations Task Group (RSOTG) kas paset ti kampania ti liderato ti PNP a mangpugipog kadagiti PAGs ken armado a grupo para iti nadalus ken natalna nga eleksion.

Segun ken ni Marquez, immuna a simmuko ti Gomez-Cachola Group idi Enero 24 ken ti Abiang Group idi Enero 25.

Nakalista ti Gomez-Cachola Group a kas crime group idinto a naibilang ti Abiang Group a partisan armed groups a mapapati a matangtangdanan nga agiwaywayat kadagiti panagpapatay iti maikadua a distrito ti Ilocos Sur.

Kinuna ni Marquez a boluntario a simmuko dagiti dua a grupo iti polis a sinaksian dagiti opisial ti lokal a gobierno ket naglibakan dagitoy ti pannakainbolbarda iti aniaman nga iregularidad nangruna iti panawen ti eleksion.

Inkari dagiti grupo iti pannakikooperar ken itutulongda iti PNP iti gannuatna a kappia ken talna iti bukodda a lokalidad.

Nangisuko ti Abiang group iti maysa a short caliber .38 pistol addaan kadagiti bala ken maysa a homemade shotgun nga awanan iti markings ken bala.

Kinuna ni Marquez a resulta daytoy iti nagtipon a kampania maikontra kadagiti amin a lapped iti pannakaisayangkat iti secure ken fair elections.#