Footer

Criminal justice system seminar, naangay

CABUGAO, Ilocos Sur – Maysa a seminar ti inangay dagiti mangbukbukel iti criminal justice system itay Setiembre 9-10 tapno mapapigsa ti sistema ti hustisia iti probinsia.

Karaman kadagiti modules ti custodial investigation and inquest procedure, preliminary investigation, admissibility of evidence in court and chain of custody, important provisions of  R.A. 9165, S.O.C.O., practical exercises on S.O.C.O., pillars of justice system, warrantles arrest ken internal security operations.

Iti opening program, kinuna ni PNP Provincial Director Virgilio Fabros a dakkel ti maaramidan ti pannakaisayangkat ti nadakamat a seminar  tapno maaddaan iti panagkaykaysa dagiti lima nga adigi ti criminal justice system.

Innayonna a kasapulan a saggaysaenda nga ammuen dagiti pagkapsutan dagiti pillar ti justice system tapno maikkan iti napintas a rupa dagitoy ken maawan ti pinnabasol ken panagdudua no ania a paset ti addaan iti panagkurang.

Kinuna met ni Gob. Deogracias Victor Savellano a rumbeng nga ibiag dagiti nakipartisipar ti aniaman a naadalda iti seminar kasta metten a papigsaenda dagiti “values” a makatulong iti pannakatagiben ti linak ken talna iti probinsia.

“Sangsangkamaysatayo koma a mangrupak iti kinadakes para iti masakbayan dagiti ubbingtayo,” indawat pay ti gobernador.

Ti tema ti seminar: “Sama-sama Laban sa Masasama”.#