Footer

Culinary odyssey: 2 balitok, 6 a bronse, inyalat ti I. Sur

BAGUIO CITY – Walo a medalia a pakairamanan ti 2 a balitok ken innem a bronse ti inyawid ti team Ilocos Sur iti kalkalpas a 5th Hotel, Restaurant and Tourism Weekend: “A Culinary Odyssey” a naangay iti Baguio Country Club ken SM Baguio idi Setiembre 11-13.

Inyalat ni Errol Remihanez manipud iti Cabugao Beach Resort ti balitok a medalia iti Floral Design Bouquet ken bronse a medalia iti Floral Design Centerpiece Professional Category idinto a binagi met ni FJ Roma Baclig ti St. Paul College of Ilocos Sur ti balitok iti Master’s Flairtending Student Division.

Ni Baclig ti kakaisuna a babai a simmali itoy nga event.

Dua a bronse a medalia met ti inabak dagiti estudiante iti Divine Word College of Vigan a da Alexander Robert Poca ken Julius Ericson Baclic iti benneg ti Fruit and Vegetable Carving Individual  ken da Jesson Julius de Peralta ken Danilo Basallo Jr. a simmali iti Fruit and Vegetable Carving Showpiece.

Dua a bronse ti naited kada Rizalino Christle Crisostomo ti Ilocos Sur Polytechnic State College ken Aries Jay-R Fule ti SPCIS kalpasan a pimmasa iti pagbatayan dagiti hurado ti insalipda a Floral Design Bouquet. Awan ti naipaayan iti pirak ken balitok a medalia itoy a benneg.

Babaen ti panangesponsor ti Ilocos Sur Hotel Restaurant and Related Enterprise Association (ISHORE) ken ti provincial government, irepresentarto dagiti nangabak ti Ilocos Sur iti National Food Showdown a mangrugi inton Setiembre 19 sadiay Metro Manila.#