Curfew hour, maipakat kadagiti menor de edad

CAOAYAN, Ilocos Sur – Naisingasing ti pannakaipakat ti curfew hour kadagiti menor de edad ditoy nga ili iti sanguanan ti pannakapasamakĀ  ti maysa nga insidente ti pammagsol a nakainbolbaran ti maysa a menor de edad.

Insingasing ni Konsehal Freddie Querubin ti pannakaipakat ti curfew hour kadagiti menor de edad tapno maparitan dagitoy nga agwalangwalang iti dis-oras ti rabii ken malapdan ti pannakairamramanda iti saan a nasayaat nga aramid.

Kas reaksionda, sumagmamano a nagannak ti nangibatad iti panangpaborda iti pannakaipatungpal ti curfew hour kadagiti annakda a menor de edad tapno mailisida iti desgrasia ken dakes a pasamak.

Maysa pay a sagudayen ti ordinansa ti pannakaiparit kadagiti menor de edad ti panaginumda iti arak nangruna iti rabii ken aniaman nga okasion malaksid laeng ti saanda a pannakaipalubos nga adda iti kalkalsada iti naladaw a rabii tapno malapdan ti pannakainbolbarda iti riri ken pakaaramidanda iti saan a nasayaat. Naiduron ti ordinansa iti sanguanan ti pammagsol idi rabii ti Marso 24 iti Barangay Don Alejandro Quirolico a nakainbolbaran ti maysa a menor de edad.

Binagsol ni Quirino Quindoy, 15, barito, 3rd year high school, ni Rusty Llanes y Altares, 18, baro, gapu iti dida panagkikinnaawatan a mapapati a pinataud ti pannakabartekda.

Sakbay ti pammagsol, nagiinom ti suspek ken ti biktima iti lugarda a Don Alejandro Quirolico agingga iti alas dies ti rabii, ngem naparnuay ti riri iti nagbaetan ti suspek ken kasinsin ti biktima iti sanguanan ti maysa a computer shop a nagtungpal iti pannakabagkong ti biktima.

Nayospital ni Llanes idinto a boluntario a simmuko ti menor de edad iti polis.

Narekobre dagiti inbestigador ti imuko nga agatiddog iti 10 a pulgada no mairaman ti putan.

Indagadag ni Querubin kadagiti barangay officials ti panangputarda iti bukodda nga ordinansa a mangipakat iti curfew hour kadagiti menor de edad iti hurisdiksionda tapno saan a maulit ti pasamak a nakainbolbaran dagiti menor de edad.#