Curfew ordinance, maipakpakat: COP

STO. DOMINGO, Ilocos Sur – Adda latta dagiti menor de edad nga agwalangwalang iti kalkalsada bayat ti curfew hour ditoy, daytoy ti kapaliiwan ti maysa a konsehal ditoy nga ili.

Iti naudi a session ti sangguniang bayan ditoy, indagadag ni Konsehal Mario Tajon nga ingetan ti kapolisan nga ipakat ti curfew hour kalpasan ti pannakapaliiwna nga adda dagiti menor de edad nga agpaspasiar iti poblasion iti disoras ti rabii.

Kinuna pay ni Tajon, autor ti nasao nga ordinansa, a nainget ti pannakaipakat ti  curfew hour idi tiempo ni COP Arsenio Ramos.

Ngem kas reaksionna, kinuna ni COP Honesto Lazo nga ipakpakatda ti curfew ordinance ket paneknekan daytoy ti rekordda mainaig dagiti menor de edad a natiltiliwda iti napalabas.

Inkalintegan ni Lazo a saanda a mabalin nga ipupok lattan dagiti menor de edad a naglabsing iti curfew ordinance agsipud ta adda linteg a mangsalsalaknib iti kalintegan dagitoy.

Kinuna pay ni Lazo a saan nga agindeg ti kaadduan a menor de edad a masalsalamaanda nga agpaspasiar ditoy iti naladawen a rabii ket palubosanda met laeng dagitoy kalpasan ti panangbagbagada kadakuada wenno panangsukon dagiti nagannak kadagitoy.

Maipakpakat ti curfew dagiti menor de edad ditoy iti manipud iti alas 10 ti rabii agingga iti alas 5:00 iti bigat. Sakupen ti ordinansa dagiti ubbing nga agtawen iti 15 agpababa.

Impatalged ni Lazo kadagiti sangguniang bayan members nga itultuloyda nga ipakat ti curfew hour kadagiti menor de edad.#