Da Bigel ken Bileg iti Biag ni Ama Berto

Sarita ni Jobert M. Pacnis

(Maudi a paset)

 

“Ne, sika met gayam klasmeyt! Dumanonka,” sinabetna daytoy.

Nagturongda iti sirok ti mangga ta di kayat ti padana a lakay ti sumrek iti balayda. Maalumiim iti kabassitna?

“Naparpariir ditoy,” kinuna ketdi daytoy.

“Nakapasiarka man, Klasmeyt…”

“Wen, Klasmeyt. Mano metten ngay ti annakmo?”

“Dua, Klasmeyt. Madamada pay laeng nga agbasbasa.”

“Kasta? Naimbag pay kenka. Ngem siak, maymaysa lat’ napessaan! Medio nasukir pay nga agbasa!”

Adu pay ti nagpatpatanganda agingga a napan ken ni Bileg ti topikoda.

“Ania ti kayatmo a sawen, Klasmeyt?” inamad ni Ama Berto.

“Gatangek laengen ‘ta asom, Klasmeyt. Bugbugtong gayam …”

“Pagan-anom koma met?”

“Taraknek. Naimbag la nga agbantay idiay balay ‘ton agsubliak.”

“Saanko nga ilako, Klasmeyt. Kakaisuna ngamin a bantaymi.”

“Gumatangkanton, a, wenno tumarakenka iti sabali.”

“Napateg kadakami ni Bileg, Klasmeyt.”

“Uray dakkel ti ibayadko?”

“Klasmeyt?”

“Nakasaganaak nga agbayad iti dakkel. Magustuak ngamin ti postura ni Bileg.”

Napaay laeng ni Tata Jose. Impatangken ni Ama Berto a dina ilako ni Bileg. Dina maaklon a mayadayo daytoy  kenkuana.

Malem ti Domingo. Immay itay sinurnadan ni Dhivielyn ti imbilin dagiti annak ni Ama Berto ta agrubuat daytoy a nasapa inton bigat. Ngem apagisu laeng ti nairemedioda. Awan ti nagpautang kadakuada. Dida kano pay nakabaybayad kadagiti immuna nga inutangda.

Nasapa a bisita ni Ama Berto ni Tata Jose iti kabigatanna. Agsubli kanon inton malem. Umayna manen ud-odan ni Bileg.

“Sigen, a, Klasmeyt,” impakaasi daytoy.

“Kas nasaokon, Klasmeyt, diak ilako ni Bileg. Nagbalinen a paset ti biagmi nga agassawa.”

Adda kinaut ni Tata Jose a nakasobre iti bulsa ti pantalonna. “Kuarta ti linaon daytoy, Klasmeyt,” kinunana. “Dies mil.”

Napabullad ni Ama Berto. Uken pay laeng  ni Bileg no palausen ti manarita ngem bayadan ni Tata Jose iti kasta kadakkel? Ania ti naknakan daytoy?

“Mabalin a dika mamati kadaytoy nga ar-aramidek, Klasmeyt. Ngem seriosoak. Interesadoak la unay ken ni Bileg.”

Saan a nakatimek.

“Makagatangkan iti adu nga aso a kasukat ni Bileg no kayatmo. Maipaw-itam payen dagiti agkabsat iti kasapulanda. Awatem daytoy…” impapetpet ti padana a lakay ti sobre.

Saan a nagkir-in. Ania, itedna ni Bileg? Kabaelanna ngata a mayadayo ti imbilangnan a kameng ti pamiliada? Kasta kadi lattan ti kalakana?

“Awatemon, Lakay,” dina napakpakadaan ni Ina Pinang nga immasideg kadakuada.

Ngem di latta a nagkutkuti.

“Sige ketdin, Lakay…”

“No agkurang dayta, ibagam laeng, Klasmeyt, ta nayonak,” kinuna ni Tata Jose. Ginandatna ti mangkaut manen iti bulsana.

“Saanen, Klasmeyt,” naala met laeng ni Ama Berto ti riknana. “Pasensiaka laengen ta talaga a diak ilako ni Bileg. Kas nakunak idin, nagbalinen a paset ti pamiliami…”

Uray la napatengngaag ni Ina Pinang. Apaman a nakalikud ni Tata Jose, inaributantannan iti sao ni Ama Berto.

“Aniaka metten, Lakay! Kuarta la ngaruden, dim’ pay la ginammatan! Di met ngarud koma nagtaud iti dakes tapno dimo awaten. Masapul daydiay dagiti ubbing!”

“Wen, ammok, Baket. Ngem napatpateg pay ngem iti kuarta ni Bileg, Baket. Maawatamto ti ibagbagak…”

“Diak ammo no ania ti adda a panunotmo!” immisugsog ti baket ket pinanawanen daytoy.

Ammon ni Ama Berto no apay nga agragut la unay ni Tata Jose a manggatang iti asona. Aramatenna daytoy iti pallot a bisiona. Segun kadagiti lallakay, nagasat kan’ ti manok a maaprosan wenno mapainum iti danum a nagbugguan ti aso a nayanak a bugbugtong.

Kabigatanna, innala ni Ama Berto ti titulo ti tawidna a bangkag ket isun ti napanna insalda ken ni Sir Tibker dita Amianan. Maawatan met ngata dagiti nagannak kenkuana ti inaramidna. Dina met ilako. Sakaennanto met laeng. Mangnamnama a masupapakanto amin dagitoy apaman nga agturpos dagiti annakda.

Indawat ketdi ni Ama Berto ken ni Sir Tibker nga isu latta ti mangbangkag iti insaldana. Immannugot met ti maestro yantangay dina met la masango.

NABAYAG a di pinagpagunian ni Ina Pinang ni Ama Berto. Ngem saan lattan a nagtagtagari ti lakay. Maawatanna ti asawana. Ngem inton kaano man, dinanto ilako ni Bileg! Maay-ayatan la unay iti asoda ta tinawid daytoy ti kababalin daydi Bigel nga inana. Inton kuan, adda isangpet daytoy a lames, no saan banias wenno mangungubog. Nalaing pay nga agbantay iti rabii. Mapanna pay wanawanan ti bangkagda iti laud no kasta nga umadalemen ti rabii.

Idi agtanoy, kinasarita met laeng ni baketna. Isu payen a mismo ti mangipalagip kenkuana ti panangpakanna wenno panangpadigosna ken ni Bileg.

ADDA da Ama Berto, Ina Pinang, CJ ken Bileg iti paraanganda kadayta nga agsapa. Paspasungadanda ni Rilo a naggapu idiay Manila a nangalaanna iti board. Nasuroken a makalawas a nalpas ti eksamna. Inurayen daytoy ti resulta.

Intulod ti traysikelan a kaarrubada ni Rilo. “Addan ni Indyinir, Angkel!” impukkaw daytoy idi idisdissaagnan dagiti gargaret ti anakda.

Sinabetda ni Rilo. Anian a ragsakda ta naipasa ti anakda ti board.

“Congratulations, Anak!”

“Sagutko kadakayo daytoy a balligik, ‘Tang,” kinuna ti anakda.

Kimmalawikiw met ni Bileg iti anak ti amona. Sa dinilpatanna ti pantalon daytoy.

“Manong,” kinuna ni CJ, “congratulations kano kuna ni Bileg.”

Bimtak ti katkatawada.#