DA, guyguyugoyenna mannalon nga agprodukto hybrid a bukbukel

SAN JUAN, Ilocos Sur- Kinuna ni Department of Agriculture Regional Director Atty. Cipriano Santiago a guyguyugoyen ti opisina ti panagprodukto dagiti mannalon iti hybrid seeds tapno saan nga agkurang  dagiti kasapulan a bukbukel a maimula iti probinsia.

“Guyguyugoyenmi dagiti mannalon tapno agproduce iti hybrid a bukbukel tapno masupusopan ti panagkurang ti kasapulan a bukel ditoy,” kinuna ni Santiago.

Ni Santiago ti maysa kadagiti sangaili ti probinsia iti pannakaangay ti Farmer’s Summit a naangay iti BArangay demo farm iti San Juan, Ilocos Sur idi Mayo 7 a dinar-ayan dagiti mannalon, municipal agriculture officers, sumagmamano nga opisial dagiti local government units, pannakabagi ti DA, NFA, Nueva Segovia Consortium of Cooperatives ken dadduma pay nga NGOs.

Segun ken ni Santiago, agkurkurang ti certified  seeds a maimula iti probinsia ta 30-35 porsiento laeng ti agmulmula iti certified seeds iti Ilocos Sur idinto a mapan a 34 laeng  dagiti  seed producers a nakaigapuan iti itatayok ti presio ti bukbukel manipud iti P800 iti P1,200 kada sako.

“Tapno masolusionan ti problema, mangteden ti DA iti farmer`s  subsidy,” kinuna ti regional  director .

Iti eskima, ibaklay ti DA ti P760 ket P440 laengen ti ibayad dagiti mannalon iti kada bag ti certified seeds a gatangenda.

Segun iti regional director, masapul laeng a mapan agpalista dagiti mannalon kadagiti municipal technicians tapno mailista ket mairamanda iti daytoy a programa ti DA.

Target ti DA a maikkan iti subsidy ti 270,000 nga ektaria iti sibubukel a Region I.

Kabayatanna, kinuna ni Gob. Deogracias Victor  Savellano a madadaan ti gobierno probinsial a mangibaklay pay laeng iti subsidy tapno mapadarasen ti pannakaiwaras dagiti bukbukel kadagiti agmulmula iti probinsia.

“Dakamin ti mangbayad ta makaammokaminto a mangsingir iti DA,” kinuna ti gobernador.

Iti sabali a bangir, impakaammo ni Savellano a madaman ti panagiwarasda iti bukel ti white corn kadagiti mannalon tapno maimula a  kas sandi ti bagas no bilang agtultuloy ti krisis. Libre a maited dagitoy santo suktan ti mannalon  apaman a makaapit. (Mancielito S. Tacadena/NBN Vigan)