Daan a pasdek iti Heritage Village panggep a gatangen ti city government tapno marehabilitar

VIGAN CITY – Linagidaw ti maysa a konsehal ditoy ti nabuntog a panaguyas ti expropriation case nga impilada tapno magatang ti gobierno ti siudad ti maysa a nabaybay-an a pasdek iti mismo a Heritage Village, pakasarakan kadagiti daan a pagtaengan a naipatakder pay idi tiempo dagiti Kastila.

Kinuna ni Konsehal George Villanueva nga aganayen nga uppat a tawen sipud idi impilada ti expropriation case ket awan pay ti paglawaganna.

Kinuna ti konsehal a panggep ti city government nga irehabilitar wenno aramiden a maysa a complex ti agrakrakaya a pasdek a masarakan iti Heritage Village no magatangna daytoy.

Ti peggad nga itden ti agrakrakaya a pasdek kadagiti lumabas a turista wenno sangsangaili gapu iti pannakabaybay-ana iti panaglabas ti tiempo, malaksid nga agbalbalin nga eye sore, ti gapuna a nangipila ti city government iti expropriation case tapno magatangna daytoy.

“Kayatmi ti fast resolution daytoy ta iti panaglabas ti panawen ket agdet-deteriorate metten daytoy a building,” kinuna ni Villanueva idinto nga innayonna a dida kayat nga adda madisgrasia a turista bayat ti ilalabasda iti nasao a building.

Kinuna ti konsehal a makipatpatangda iti akinkukua ti nasao a pasdek tapno makapagkompromisoda ken makapagsusurotda iti presio tapno magatangda ti nasao a disso.

Kinuna ni Villanueva a no matuloy a magatang ti city government ti nasao a building, marehabilitar wenno mapagbalin a complex tapno mainayonto daytoy a pasiaren dagiti turista iti kaaddada iti Heritage Village.

Nagbalinen ti Heritage Village a kangrunaan a destinasion dagiti turista iti Amianan a Luzon gapu kadagiti duog a pagtaengan a napatakder pay idi tiempo dagiti Kastila.

Karaman ti Vigan City kadagiti adda iti listaan ti United Nations Educational, Scientific, and Cultural Organization a heritage city iti intero a lubong.

Maysa pay ti Vigan City para kadagiti pagpilpilian iti New7Wonders Cities.#