Footer

Dadaulo ti board ti PNRC-I. Sur iti 50 a tawen, inyawatna ti takemna

SAN ILDEFONSO, Ilocos Sur – Kalpasan ti panagpaayna a chairman ti board of directors ti Philippine National Red Cross iti limapulo a tawen, inyallawat ni sigud a gobernador Carmeling Pichay Crisologo ti takemna iti  sumublat kenkuana iti simple a programa a naangay ditoy nga ili idi Disiembre 20.

Kas panangbigbig iti serbisiona, nagbalin a chairman emeritus ni Crisologo iti nasao nga ahensia.

Kanaig daytoy, nagyaman ni Crisologo iti gobierno probinsial iti suporta nga impaayda kadakuada bayat ti panangidaulona iti Red Cross iti probinsia iti uneg ti 50 a tawen.

Dinawatna kadagiti agtutubo a volunteers tapno ituloyda ti agserbi kadagiti umili babaen ti itutulongda iti PNRC.

Kabayatanna, ninayonan ti gobierno probinsial ti tinawen a tulongna iti Philippine National Red Cross tapno nasaysayaat pay ti panangipaayna iti serbisio kadagiti umili.

Inaprobaran ni Gov. Luis “Chavit” Singson ti panagdoble ti sigud a mait-ited a P150,000 tapno agbalin a P300,000 a tulong ti gobierno probinsial iti nasao nga ahensia.

Inkari pay ni Singson a malaksid iti nasao a gatad, sidadaan ti gobierno probinsial a tumulong kadagiti programa ti PNRC agsipud ta napateg ti akem ti daytoy nga ahensia kadagiti kaprobinsiaan a makasapul iti dara.

Dinawat ti gobernador ti pannakitinnulong ti amin tapno maala ti tipo ti dara dagiti residente ti barbarangay tapno adda listaan dagiti posible a pagalaan iti dara no adda agkasapulan iti barangay.

Ni Singson ti namagsapata kadagiti kabarbaro a kameng ti board of directors ti Red Cross-Ilocos Sur Chapter nga indauluan ni sigud a Bokal Azucena Purisima a napili kas chairman ti board of directors.

Dagiti dadduma pay kameng ti board: Mayor Germelina Singson-Goulart, vice chairman, Gilbert Arce,  sekretario, Atty. Gloria Corrales,  katulongan a sekretaria, Edelyn Tabuniar, tesorero, Alfina Tolentino, katulongan a tesorera, Triponia Rivas,  auditor, ken Benjo Verzosa,  PRO, Dr. Juanita Realubin,  mangidaulo iti komite ti blood services ken Atty. Everin Molina, legal officer.#