Dagiti Annak Ni Bacchus

Ni Jaime M. Agpalo, Jr.

 

 

Iti pannakaingato ti buis ti arak ken sigarilio gapu iti Sin Tax bill, namnamaen ti panagngato ti presio dagitoy a tagilako. Ket medio agpanunot pay ngata iti mamindua dagiti annak ni Bacchus   sakbay a gumatangda kadayta agua de pataranta a pangpaayus ti nagmaga a karabukobda tapno agkutikuti ket saan a sumikkil wenno kumraang-agrengngat iti uray la gapu iti nalabes a tikag. Kas ‘tay tungtongan iti ubet ti baso, sumaranta met ti nagsamsamuyeng a rikna iti pannakalidok; a no dadduma masobraan dagiti mangnginom ket mayaten ti garakgakda, kasladan gakong a gumanakgak.

Pakasaritaan dagiti annak ni Bacchus daytoy a sinurat, maysa a taldiap…

Naggaputayo met dita. Anaknatayo met idi ni Bacchus. Dua a bote a babassit wenno maysa a longneck a brandy tunggal malem, a no dadduma, manayonan pay, agingga a natnag ti salun-at ket ikarkaro pay laeng kadagitoy nga aldaw ti bunga ti nalabes unay a panagayat iti payapay ken karisma ni Bacchus—ti didiosen ti arak.

Kastan sa, aya dagiti piksionista-mannurat? Ha? Ne, wen, kuna met dagiti sutil…!

Iti intay panangpalabas iti pakasaritaan dagiti nalalatak a piksionista iti sangalubongan a naipablaak iti Listverse, lalo dagiti rinaraem gapu kadagiti gapuananda, natakuatantayo nga adu met kadakuada ti nagbalin nga annak ni Bacchus!

Uray la tao napanganga iti kas iti kalawa ti nganga ti sumikbab a buaya ken napakudkod pay iti saan met a nagatel a tuktok ta uray iti rinaraemtayo a babai a mannurat, ni Dorothy Parker ket binisiona met ti arak. Sus, ania ketdin! Ti kinalaka nga agkonekta ti relasionship ni agbasbasa ken ti sinurat ni Dorothy Parker ti pagayatantayo la unay, awanen ti palpalikaw-palpalikos; no natengngelnan ti rikna da readers, saannan nga ibbatan dayta agingga iti punget-paggibusan ti sinuratna a mangibunga iti dinto agkupas a pannakapnek. Immuna a nabasatayo ti sinuratna a Big Blond idi katengngaan ti 1970s iti bassit ngem napuskol a libro, ti The Best American Short Stories.

Ti popular nga ammotayo a naayat iti arak ket ni Edgar Allan Poe ken ni Ernest Miller Hemingway. Pagaayatda a lidoken ti babato ni Bacchus nga isu met ti nangitulod kadakuada iti innem a kadapan iti tukot ti daga; in short,  timmangadda iti barsanga. Ni Hemingway pay a mismo ti nanggeppas ti linas ti biagna gapu ken ni Bacchus, anian!

Ket wen, uray la datao nagngilangil a napaillek kabayatan a sursuraten daytoy nga artikulo/kolum ta uray met ni James Joyce ket arak met ti bisiona, ken puon pay kano dayta ti naynay nga inna pakibinnurakan-pakipinnittakan iti rupa. Kibor no kibor ti inna paginuman, he-he-he! James Augustine Aloysius Joyce ti pangatiddogen a buniagna.

Nailabegtayo pay nga uray gayam ni William Cuthbert Faulkner ket mangnginum met, heavy drinker, ngem isu laeng ti serioso a nangibaga a no agsursurat wenno panggepnan ti agsurat ket saan metten a tumimtim iti arak. Saan a kas kadagiti dadduma a kabayatan ti panagsuratda ket panay met ti lidokda, a kapada daydiay nabasatayo a pakasaritaan ti maysa a nalatak a mannurat a nakomision a mangsurat iti maysa a nobela ket adu ti bumbonna nga arak kabayatan ti panagsuratna ken kas kanayonan dayta, naynay ti panangtsek-ap kenkuana ti doktor.

Ni O. Henry ket mangnginum met, heavy drinker, a ni Bacchus ti nangikutkot kenkuana iti kinarigat, ta inkarkarona ketdin ti nagbarbartek idi naalugi ti negosiona. Nome de plume laeng daytoy ni William Sydney Porter. Idi katengngaan ti ‘70s (iti koleksion ti best American Short Stories) a nabasatayo ti saritana a Municipal Report, a nakaited iti impluensia kadatayo iti panagsurat iti twist ending, nga isuda ti nalatak iti kastoy nga estilo. Uray no nakaat-atiddog dagiti ababa a sarita, a kapada dagiti dadduma a sarita ni Dorothy Parker, makapaklaat ti paggibusan ti sarita, saan a namnamaen a kasdiay ti paggibusan, a kas iti twist ending iti sarita a The Necklace ni Guy de Maupassant.

Iti met laeng katengngaan ti ‘70s a nakabasaantayo ti sinurat ni John Cheever, a maysa met gayam a naayat ti arak.

Nagbisio met iti arakda Hunter Thompson, Raymond Chandler,  Tennessee Williams, Dylan Thomas, Truman Capote, Charles Bukowski, F. Fitzgerald, Frederick Exley, Harry Crews, Jack London, ken Stephen King. Adu pay dagiti nalalatak a mannurat a nagbisio ken naidagem iti babato ni Bacchus.

Ania ngarud, naimas met! Parte ti biag a kunada. Ngem no masobraan, madi, ta amin nga agsobsobra ket saan a nasayaat ta isu met ti puon ti nalaus unay a pagbabaywan iti udina no di man isu ti panangisurat ti pluma iti tallopulo.#