Dagiti Aparision ti Birhen sadiay Lourdes (Tuloyna)

Salaysay ni Samuel Allan Esperanza

 Maikawalo nga Aparision

Pebrero 24, 1858

Saan a nakalisi dagiti mapaspasamak iti groto ti nasiput a mata dagiti adda iti warnakan. Ngem sabali ti naipadamag iti maysa a lokal a pagiwarnak: ti maipapan ti panagpakpakita ti Babai iti maysa a kissiw nga ubing.

Iti daytoy nga aldaw, Pebrero 24, uppat agingga iti lima a gasut dagiti tattao a naguurnong iti groto.

Apaman a nakasangpet ni Bernadette, dagus a rinugianna ti nagrosario. Madamdama, nagirig a pasango ket rimmaniag ti rupana ken timmamdag ti nagsam-it nga isem iti bibigna.

Bayat ti aparision, naimaldit iti rupa ni Bernadette ti liday ket naglulumba dagiti lua iti pingpingna. Simmango iti tallaong sana imbalikas iti namitlo: “Penitensia… penitensia… penitensia!” Nagiinnallatiw daytoy a balikas iti bibig ti tallaong.

Daytoy ti immuna a mensahe ni Bernadette para iti publiko. Daytoy metten ti maanag a turongen ti panagparparang ti Babai iti ubing.

 

Maikasiam nga Aparision

Pebrero 25, 1858

 

Iti daytoy nga aldaw, kakuyog ni Bernadette ti ikitna a napan iti groto. Nasapa pay ngem adun dagiti tattao nga umabot iti uppat a gasut.

Nagparintumeng ni Bernadette ngem di pay nangrugi nga agkararag idi nakaparintumeng a nagna iti bakras nga agturong iti uneg ti groto. Idi makadanon iti ridaw ti kueba, impaigidna dagiti sanga a nagsalumpayak sa immuneg iti likud ti groto.

Nagbaw-ing ni Bernadette ket nakaparintumeng met laeng a nagsubli iti munturod a dati a pagkararaganna.

Manipud iti yanna, tinurong ni Bernadette ti maysa nga atap a rosas ket inwalinna daytoy sana inagkan ti bato idinto a nabalkot manen iti naisangsangayan a bileg. Timmakder ni Bernadette sa nagna nga agturong iti Karayan Gave, sa manen nagsardeng ken timmaliaw iti likudanna a kasla adda nangawag kenkuana. Sabali a direksion ti sinurotna, iti maysa nga abut iti baba ti bato.

Rinugianna ti nagkali babaen ti imana. Rimkuas ti napitak a danum ket daytoy ti inakupna babaen dagiti dakulapna sana namitlo nga imbelleng. Iti maikapat nga akup, ininumnan ti danum.

Iti daytoy nga inar-aramid ni Bernadette, nagkakatawa dagiti tattao ken sabalin ti panagipapanda – agmauyongen ni Bernadette. Nakarkaro manen ti suspetsada iti makitada a nginalngal ti ubing dagiti atap a mula nga agtubtubo iti sakaanan ti bato.

Nagtandaan ni Bernadette sa rimmuar iti kueba ken nagparintumeng manen agingga iti nagpukaw ti Babai iti imatangna.

Dinagdagus ni Aunt Bernarde nga inyadayo ti ubing nga itan ket lalaisenen ti tallaong a maysan nga agmauyong.

Ngem kastoy ti panangilawlawag ni Bernadette: “Bayat ti panagkararagko, kinuna ti Babai – Inka uminom ken agbuggo iti fountain. Agsipud ta diak ammo ti yanna, impatuldo ti Babai babaen ti imana – iti babaen ti groto iti makannigid a paset. Ngem awan ti nakitak a danum isu a kinalik ti daga ket adda rimmuar a danum. Pinalitnawko bassit sako ininum ken nagbuggoak.”

Iti dayta a malem, iti nagkalian ni Bernadette, saan laengen a taredted ti danum ti nangpunno iti abut no di ket limmawa daytoyen ta nagbalinen nga ubbog.

Iti las-ud ti duapulo ket tawen, nagbalin a dakkel a pagdedebatean daytoy nga ubbog – ti nagtaudanna ken no milagrosa kas imbatbatad dagiti tattao nga addaan iti sagubanit ti bagi a mapapati a naagasanda babaen ti danum a naggapu iti ubbog.

Maysa a nalatak a hydrogeologist, ni Abbe Richard, ti nangiwayat iti naunday ken nainget a panagadal mainaig iti ubbog iti groto.

Segun kenkuana, milagro ti pannakadiskubre ti nasao nga ubbog ken iti epektona, ngem saan a karkarna ti kaaddana.

Timpuar kadagiti dadduma a naisayangkat a panagadal a nagtaud ti ubbog iti mismo a bato, ingget sin-aw ti danum nga addaan laeng iti bassit a deposito ti asin ngem awan ti makaagas nga ingredientena.

Ngem ti panangamiris ni Monsieur Filhol ti Toulouse Faculty of Sciences iti danum manipud iti ubbog ti napnuan kaipapanan: “Dagiti naisangsangayan a resulta a naipakpakaammo kaniak a naragpat babaen ti panagusar iti daytoy a danum, ket saan a maipalawag, iti agdama a kondision ti sientipiko a pannakaammo, babaen ti saguday dagiti asin a ti kaaddada ket limtuad babaen ti panangamiris”.

Adu pay dagiti naisayangkat a panagamiris iti nasao a danum ngem agkakaasping dagiti resultana a saan daytoy a milagrosa ken saan a  therapeutic. Ngem pasingkedan dagiti adu a tattao nga adda dagiti milagro a napasamak iti panangaramatda iti danum agsipud ta naisalbada kadagiti nakaro a sakitda iti baet ti naunday a panagpaagasda kadagiti espesialista.

(Adda tuloyna)