Dagiti Aparision ti Birhen sadiay Lourdes (Tuloyna)

Salaysay ni Samuel Allan Esperanza

 

Maika-10 nga Aparision

Pebrero 27, 1858

 

Nagbalin a dakkel a diskusion dagiti papadi iti Lourdes dagiti mapaspasamak a panagparang ti Babai iti Massabieille. Iti biang ti clergy, inyuna-unayda ti panangmentenerda iti reserbasionda tapno saandanto a mababalaw iti masakbayan.

Ngamin, kayarigan dagiti papadi ti maipit iti nagbaetan ti dua a bato. No agparangda iti groto ket marekognisarto ti bision iti Massabieille, maakusaranda a nangiduron iti pannakabigbig ti bision babaen ti panagmanipulada. Iti sabali a bangir, no mapudasdasan nga awan ti kinapudnona ti pagteng, malais ken makatkatawaandanto. Napagtinonganda ngarud ti saanda a panagtignay wenno panagbalikas tapno saan a maipasubo iti mapagduaduaan a kasasaad ti interesda iti relihion ken ti dignidadda a kameng ti clergy.

Iti daytoy nga agsapa, nasapa latta a napan ni Bernadette iti groto iti baet a saan a nagparang ti Babai iti aldaw sakbayna.

Kas kadagiti ipapanna iti groto, nagkararag ni Bernadette, ket bayat ti panagparang ti Babai, iggem ti ubing ti nabendisionan a kandela. Nakita ti tallaong nga adda dagiti kanito a nakaisem, ken dagiti darikmat nga agsangit. Inagkanna pay ti sakaanan ti bato.

Idi dandanin aggibus ti bision, imbilin ti Babai nga ibagana kadagiti papadi ti panangbangonda iti maysa a kapilia iti dayta a disso.

Nupay adda panagamak ni Bernadette ken ni Abbe Peyramale, nagderetso iti presbiterio kalpasan ti bision ket imbagana iti padi ti bilin ti Babai.

Dinamag ti padi no asino ti Babai ket idi insungbat ni Bernadette a dina ammo, sinaludsod ti padi a kasano a mangidanon iti mensahe manipud iti maysa a tao a dina ammo?

Pinaisalaysay ti padi ken ni Bernadette dagiti napaspasamak iti groto ket daytoy ti inaramid ti ubing. Napunas aniaman  s panagduadua ti padi gapu iti nakitana a kinasinseridad ni Bernadette. Ngem saan nga imparang ti padi ti kaririknana. Kinunana ketdi nga adda amakna a biktima ti ubing iti ilusion sana innayonna nga ibaga ni Bernadette iti Babai a saan nga ugali ti parish priest ti Lourdes a patgan ti kiddaw ti tao a dina am-ammo. Kinunana a masapul a maammuanna ti nagan ti Babai ket paneknekanna nga isu ti agtagikua iti dayta a nagan.

“No adda kalintegan ti Babai iti kapilia, maawatannanto dagiti imbalikasko kenka…” kinuna pay ti padi.

 

Maika-11 nga Aparision

Pebrero 28, 1858

 

Iti daytoy nga agsapa, saan laengen a ginasut no di pay aganayen a dua a ribu dagiti tattao a napan nangimatang iti mapaspasamak iti groto.

Bayat ti bision, nagna ni Bernadette babaen ti tumengna ken inag-agkanna ti daga ket nagkapitakan ti rupana. Ngem awanen ti nanglais kenkuana, saan a kas idi damo a kinatkatawannda.

 

Maika-12 nga Aparision

Marso 1, 1858

 

Kas nadakamaten, adu dagiti saan a namati iti panagparparang ti Babai ken ni Bernadette ket nagiwayat dagitoy kadagiti wagas tapno maputed dagitoy a patienda a panangbalballaibo kadagiti tattao. Ngem saanda a nagballigi ket sinabalianda ti  addangda: inladawanda ni Bernadette nga agmauyong, epileptic, palso, ulbod ken dadduma pay a birngas a pangdadael iti ubing.

Iti baet dagitoy a panangublag dagiti di mamati, adu ketdi dagiti namati a ni Birhen Maria ti agparparang ken ni Bernadette nupay saan nga imbatad daytoy. No madamag iti ubing no asino ti agparparang kenkuana, isungbatna ti “ti Babai”.

Iti daytoy nga aldaw, kas aramidna, nagparintumeng ni Bernadette, ket inruarna ti rosariona. Ideppelna koma ti rosario iti mugingna ngem nagsardeng ti imana iti ere idinto a kellaat a naimaldit iti rupana ti pannakasdaaw. Insublina ti rosario iti bulsana sa nangiruar iti sabali a rosario sana intag-ay. Rimmaniag ti rupana ket naisemen a nangirugi iti panagrosariona.

Impapan dagiti tattao a binendisionan ti ubing dagiti rosarioda.

Pinidut met daytoy ti maysa a pagiwarnak ket inladawanna ni Bernadette a maysa a nalaing a mangmanipula kadagiti tattao ken nagpammarang a maysa a priestess.

Ngem inlawlawag ni Bernadette kalpasan ti bision nga idi adda iti dalan a mapan iti groto, maysa a babai nga agnagan iti Pauline Sans ti nagkiddaw kenkuana nga usaren ti ubing ti rosario daytoy bayat ti panagkararagda ken iti Babai.

Kinuna ni Bernadette nga idi inruarna ti rosario ni Pauline Sans, saanna a maitag-ay daytoy agingga iti mugingna. Dinamag kano ti Babai no ayan ti rosariona ket idi intag-ay ti ubing ti iggemna a rosario, imbaga ti Babai a saan a daytoy ti rosariona.

Naamiris ni Bernadette a ti rosario ni Pauline Sans ti iggemna a rosario isu nga insublina iti bulsana sana inruar ti bukodna a rosario.

Kinuna kano ti Babai a dayta ti usarenna iti panagkararagna.

Sinaludsod pay ti maysa a padi no agpayso a binendisionan ni Bernadette dagiti rosario. Insungbat ti ubing a saan nga agar-aramat dagiti babbai iti stole (maysa a kagay nga aramat dagiti deacon ken papadi).

(Adda tuloyna)