Dagiti Aparision ti Birhen sadiay Lourdes (Tuloyna)

Salaysay ni Samuel Allan Esperanza

 Maika-13 nga Aparision Marso 2, 1858

Awan ti nakaidumaan daytoy nga aldaw kadagiti immuna nga aldaw a panagparang ti Babai. Kas iti sigud, simmangpet ni Bernadette iti groto a nasapa ket nagkararag. Ngem kalpasan ti bision, nadlaw dagiti antina a da Basille ken Lucile a mariribukan.

Naammuanda nga imbaga manen ti Babai ti ipapanna panangibaga ken ni Abbe Peyramale ti kiddawna a maipatakderan iti kapilia iti Massabieille ket agnerbios a makipatang manen iti padi. Kiniddaw ni Bernadette ti panangkuyog kenkuana dagiti ikitna.

Ngem saan a nagkir-in ti padi iti pagtaktakderanna a kayatna a maammuan no asino ti babai, nagtaudanna, ken no ania dagiti nagapuananna tapno maipatakderan iti pagtamedan kenkuana.

Kinuna pay ti padi a santo la mamati iti Babai no makaipakita iti wagas a pangbigbig ken mangted iti otoridad kadagiti mensahena ket mapasamak la dayta no mapagsabongna ti rosas a mula iti babaen ti nitso a pagparparanganna iti sanguanan dagiti tallaong.

“Iti kanito nga umaymo ibaga kaniak a napasamak daytoy, mamatiakton iti balikasmo ket ikarik a kuyogenka pay a mapan iti Massabieille,” kinuna ti padi.

Napigsa ken nabatad ti timek ti padi ket napabutngan ti ubing isu a nalipatanna nga imbaga ti maikadua a paset ti mensahe ti Babai kenkuana.

Kiniddawna iti ikitna ti panangkuyogna kenkuana nga agsubli manen iti padi ngem kas kenkuana a maamak daytoy isu a saan nga immanamong. Uray dagiti dadakkel ni Bernadette ket maamakda nga umasideg iti padi ket saanda a nakuyog ti ubing.

Naimbag ta nayat ti kaarrubada a ni Dominiquette Cazenave ket isu ti immasideg iti padi para iti pannakipatang manen ni Bernadette kenkuana.

Imbaga ni Bernadette ken ni Perramale a kiniddaw pay ti Babai a malaksid iti kapilia a maipatakder iti Massabieille, tarigagayna pay nga aglibut dagiti tattao a mapan iti groto.

Kinuna ni Peyramale a no talaga a ti Babai ket isu ti isu a kayatna a pagparangen, ammona koma a saan a kualipikado ti padi a mangiwayat iti initiatibo mainaig iti panagprosision dagiti tattao a mapan iti groto.

Innayon ti padi a saan koma nga isu no di ti Obispo ti Tarbes ti nangibaonan ti Babai kenkuana.

Ngem insungbat ni Bernadette nga idi dakamaten ti Babai ti panagprosision dagiti tattao a mapan iti groto, ti masakbayan ti dakdakamatenna, saan nga iti agdama.

Kinuna ti padi nga ikkanna laengen iti silaw ni Bernadette nga aglibot a solona agsipud ta adu dagiti pasurotna ket saanna a kasapulan dagiti padi.

Ngem kinuna ni Bernadette a dina dawdawaten kadagiti tattao a surotenda iti groto.

Tapno aggibusen ti patanganda, kinuna manen ti padi a saludsoden ni Bernadette ti naganna, ket apaman a maammuanna, mangipatakder saan laeng a kapilia, no di dakdakkel pay!

 

Maika-14 nga Aparision Marso 3, 1858

 

Agarup tallo ribu a tattao ti nagdudupudop iti groto iti daytoy nga aldaw. Alas siete idi simmangpet ni Bernadette, kaduana ti inana. Kas iti sigud, nagkararag ni Bernadette. Ngem nakita dagiti tattao a saan a kas karaniag ti rupa ti ubing iti napalpalabas.

Naammuanda ti gapuna – saan a nagparang ti Babai.

Kadagiti kakasinsinna ti nangipalgakan ni Bernadette no apay a saan a nagparang ti Babai iti dayta nga agsapa: adda dagiti tattao iti tallaong a saan a maikari a makakita kenkuana iti presensia ti Babai agsipud ta pinalabasda ti rabii iti groto ket dida rinespeto ti lugar.

Ngem nagsubli ni Bernadette iti groto iti alas nuebe ti bigat, kaduana ni Andre Sajous, kabagianna a nangipaay iti pagindegan dagiti ag-Soubirous a saanda nga agupa iti Cachot. Idi makadanonda iti groto, manmano dagiti tattao ta nakapanawen ti kaaduan.

Nagparang ti Babai ken ni Bernadette ket nagkararagda a dua.

Kalpasan ti bision, napan manen kinapatang ni Bernadette ti padi mainaig iti kiddaw ti Babai a pannakaipatakder ti maysa a kapilia.

Kinuna ni Bernadette nga imbagana iti Babai ti nagpatanganda iti napalabas nga aldaw ket immisem daytoy idi maammuanna ti kayat ti padi a mapasamak a milagro babaen ti panagukrad ti sabong ti rosas.

Dinamag ti padi no adda kuarta ni Bernadette a pagpatakder iti kapilia ket insungbat ti ubing nga awan.

Kinuna ti padi nga uray isu ket awan ti kuartana. Indagadagna ken ni Bernadette a dumawat iti Babai iti pagpatakderna iti kapilia.

 

Maika-15 nga Aparision Marso 4, 1858

 

Iti daytoy nga aldaw ti maudi nga aldaw iti sangapulo ket lima nga aldaw nga inkari ni Bernadette iti Babai nga ipapanna iti groto.

Adu ti namati nga adda milagro wenno datdatlag a mapasamak iti daytoy nga aldaw isu a rinibribu a tattao ti nasapa a nagturong iti groto. Adda dagiti naglugan, nagsakay iti kabalio, adda dagiti nagnagna iti nawatiwat tapno saksianda ti panagparang ti Babai iti daytoy nga aldaw.

Iti bisperas daytoy nga aldaw, nakaranraniag ti aglawlaw ti groto kadagiti nagangtan a silaw idinto a nagkakanta dagiti tattao kadagiti himno.  Idi dimteng ti agsapa, mapattapatta nga addan duapulo a ribu a tattao a nagdudupudop iti aglawlaw ti groto.

Gapu iti kaadu dagiti tao, nagpatulong ni Jacomet,  dadaulo ti polis, kadagiti pannakabagi ti linteg manipud iti Garrison tapno adda kanayonan a katulonganda a mangkontrol iti tallaong tapno awan ti mapasamak a dakes.

Sinukimat pay da Jacomet iti rabii sakbay daytoy nga aldaw ti groto ken ti aglawlaw daytoy no adda dagiti naipakni a makapadangran ngem awan ti nakitada. Inulitda manen ti nagsukimat iti nariwet pay a parbangon ngem awan ti nasukainanda a suspetsado a bambanag.

Nakimisa ni Bernadette iti alas sais ti agsapa ngem kalpasan ti komunion, adda bileg a nangguyod kenkuana a mapan iti groto. Saanna payen a naipakaaammo iti kasinsinna ket kinamkamat daytoy idi masiputanna laengen a pumanaw iti simbaan.

Winayaan dagiti polis ti dalanna idi makadanon iti groto iti apaglabes ti alas siete.

Nagparintumeng ni Bernadette iti lugar a paglulualoaanna, iggem ti maysa nga imana ti maysa a kandela idinto a rosario ti sabali nga imana. Nakaturong dagiti matana iti nitso ken iti mula a rosas.

Pagammuan, naimaldit ti panagbalbaliw iti rupana ket naggiinnallatiw daytoy iti tallaong a sangsangkamaysa a nagparintumeng.

“Iti dayta a momento, nakariknaak iti nagpaiduma a kinaragsak; nariknak ti presensia ti maysa a supernatural a katatao, ngem nupay kasano a panangigaedko, awan ti makitak,” daytoy ti panangisalaysay ni Jeanne Vedere, maysa a kasinsin ni Bernadette.

Napaliiw pay ni Jeanne a namitlo a naikararag ti rosario iti dayta a bigat ket iti gibus ti panagrosariona, agtandaan koma ni Bernadette ngem saanna a maitag-ay ti imana iti mugingna. Naammuanna ken ni Bernadette a nasapsapa a naggibus ti panagrosario ti ubing ket sana laeng naaramid ti nagkurus idi malpas ti Babai a nagrosario.

Uray idi nalpasdan a nagrosario, saan pay a nagpukaw ti Babai. Daytoyen ti kabayagan a panagparang ti Babai ta nagpaut iti nasurok a maysa nga oras.

Idi nagpukawen ti Babai ket pumanawen ni Bernadette, sinaludsod dagiti tattao iti asideg no kasano a naggibus ti bision.

Insungbat ni Bernadette nga immisem ti Babai idi pumanaw ngem saan a nagpakada kenkuana.

Kinuna pay ni Bernadette nga uray nalpasen ti dua a lawas nga inkarina nga ipapanna iti groto, agtultuloy latta ti ipapanna nupay dina ammo no agparang pay ti Babai wenno saan.

(Adda tuloyna)