Dagiti Aparision ti Birhen sadiay Lourdes (Tuloyna)

Salaysay ni Samuel Allan Esperanza

 Maikat-16 nga Aparision

Marso 25, 1858

Iti daytoy nga aldaw, nasapa ni Bernadette a napan iti groto. Kaduana dagiti dadakkelna, iggemna ti nabendisionan a kandela.

Daytoy ti umuna nga ipapanna iti groto iti bigat manipud iti daydi naudi a panagparang ti Babai, nasurok a dua a lawasen ti napalabas. Iti las-ud dayta a panawen, iti laeng naladaw a malem ti ipapanna iti groto ket pinalabasna ti oras iti panagkararag ken panagpanunotna.  Iti uneg ti kueba iti sakaanan ti groto ti naipakadawyan a papananna, ket nupay nasipnget ditoy a paset, daytoy ti napilina a pagpanunotan a naulimek.

Saan metten a kas iti kaadu dagiti tao a mapmapan iti groto no maidilig bayat ti panagparparang ti Babai. Ngem ketdi, nangipasdek dagiti deboto iti bassit nga altar a nakaikabilan ti Nasantuan a Birhen iti baba ti nitso ket pinalawlawanda kadagiti sabsabong ken kandela a nangpalawag iti groto

Kasta met a no adda mapan iti groto a deboto, mangibatida latta iti kuarta a donasion. Maaramatto dagitoy a donasion para iti pannakaipatakder ti kiddaw ti Babai a kapilia.

Ti nakakaskasdaaw, nupay awan ti agbambantay, awan ti nanggaraw kadagiti donasion.

Ngem idi sardam ti Marso 14, simngay manen ken ni Bernadette ti naisalsalumina a rikna a mangguyguyod kenkuana a mapan iti groto kalpasan ti nasurok a dua a lawas. Isu nga iti alas singko ti agsapa ti Marso 25, simmangpet ni Bernadette ken dagiti dadakkelna iti groto.

Ngem uray iti daytoy a kasapana, adun dagiti tattao iti groto. Mabalin a nagparikna kadakuada nga adda kabarbaro a mapasamak iti dayta nga aldaw ta piesta ti Anunsiasion ni Arkanghel Gabriel ken ni Nasantuan a Birhen Maria. Daytoy nga aldaw ti panangsaludo ni Arkanghel Gabriel ni Birhen Maria a ‘Napno iti Grasia”.

Di pay nakadanon ni Bernadette iti groto ngem nakitanan ti Babai a nakatakder iti nitso, napnuan raniag, nakaisem a mangbuybuya kadagiti naggaarimutong a tattao.

Kabayatan ti panagkararag ni Bernadette, dina nagawidan a sinaludsod iti Babai no ania ti naganna.

Kastoy ti panangisalaysay ni Bernadette kas nailanad iti Catholic Faith: “Kabayatan ti panagkararagko, simngay iti panunotko ti panangdamagko iti naganna. Kasla adda mangidurduron kaniak nga agsaludsod. Iti kamaudianan, sineknannak ti diak magawidan a rikna ket rimmuar dagiti balikas iti bibigko ket nagpakaasiak iti Babai nga ibagana no asino.

Kas iti inaramidna iti napalabas, nagtamed ti Babai ken immisem ngem saan a simmungbat.

Saan a maibaga ni Bernadette no apay, ngem nariknana a timmured ket dinamagna manen ti naganna; ngem, immisem laeng ti Babai sa nagtamed, nagtalinaed a naulimek.

Naminsan pay, dinamag  manen ti ubing ti nagan ti Babai.

Iti maikatlo a kiddaw ni Bernadette, nagbalin kano a serioso ti rupa ti Babai. Nagdumog a sipapakumbaba unay. Madamdama, pinagakkubna dagiti imana ken imparabawna iti barukongna sa timmangad iti Langit. Inin-inut a nagukrad dagiti imana sa nagtimek: “Que Soy Era Immaculada Conceptiou (Siak ti Inmaculada Concepcion).”

Immisem manen ti Babai sa nagpukaw.

Naisem a naggawid ni Bernadette, ulit-ulitenna a baliksen ti sumagmamano a balikas. Idi dinamag dagiti kaarrubana no ania ti balbaliksenna a balikas, kinuna ni Bernadette nga ul-ulitenna ti nagan nga inted ti Babai kenkuana amangan no malipatanna. Kabarbaro dayta a balikas kenkuana ket inulit-ulitna tapno dina malipatan.

Dagus a nagwara ti damag iti sibubukel a Lourdes.

Nagturong ni Bernadette iti Presbytery ket idi sinaludsod ni Abbe Peyramale ti gagarana, insungbat ti ubing nga impalgaken ti Babai ti naganna sana imbalikas ti “Immaculada Concepciou”.

Nakigtot ni Peyramale iti nangegna ngem saan a nagpadlaw. Dinamagna no maawatan ni Bernadette ti imbalikasna.

Nagwingiwing ti ubing. Ngem dakkel ti epekto iti padi ti impalgak ni Bernadette a nagan ti Babai. Kasano a naammuan ti maysa nga inosente nga ubing ti dayta a banag ket dina pay ammo ti agbasa ken agsurat? Idi laeng kanikapat a tawen, wenno 1854,  nga indeklara ti Simbaan ni Maria nga Immaculate Conception.  Awan ti posibilidad nga ammo daytoy ni Bernadette agsipud ta mangrugrugi pay laeng nga agadal iti katetismo ken agsagsagana pay laeng iti umuna a panagkomunionna.

Iti dayta a rabii, insurat ni Abbe Peyramale iti obispo ti impalgak kenkuna ni Bernadette. Kinuna ti padi: “Masinunuok a saan nga inimbento ni Bernadette dayta…”

(Adda tuloyna)