Dagiti Aparision ti Birhen sadiay Lourdes (Tuloyna)

Salaysay ni Samuel Allan Esperanza

 Ti Maika-17 nga Aparision

April 7, 1858

 Manipud idi impalgak ti Babai nga agparparang ken ni Bernadette babaen ti bision nga isu ti Immaculate Concepcion, ad-adda a pimmuskol dagiti tattao a simmarungkar iti groto. Ngamin, napukawen ti duaduada iti kinaasino ti  datdatlag a Babai. Napasingkedanen nga isu ni Birhen Maria.  Adu pay kadagiti deboto ti nangpanagan kenkuana a ti Babai iti Massabieille wenno ti “Babai iti Groto”.

Pusek ti simbaan ti Lourdes kadagiti deboto idi Abril 4, 1858, Domingo ti Panagungar ket rinibribu ti simmuknal iti groto iti nagmalmalem. Kasta manen iti kabigatanna a rinibribu latta dagiti tattao ti simmarungkar iti groto.

Nupay kasta, saan a napnapan iti groto ni Bernadette manipud idi naudi a panagparang ti Babai kenkuana ken nangipalgakanna nga isu ti Immaculate Concepcion.

Ngem iti sardam ti Abril 6, simngay manen ken ni Bernadette ti napigsa nga awis a mapan iti groto.

Kabigatanna, addan ni Bernadette iti groto iti alas sais ti agsapa. Nagparintumeng ti ubing iti sanguanan ti groto sa nagrosario.

Nagparang kenkuana ti Babai a nabalkot iti nakaranraniag a lawag. Nagpaut ti panagparang ti Babai iti nakurang nga uppat a pulo ket lima a minutos.

Maysa a milagro ti napasamak bayat ti panagkararag ti ubing.

Kabayatan ti panagkararag ni Bernadette, iggem ti makannigid nga imana ti rosariona idinto nga iggem ti makannawan nga imana ti nakagangat a kandela.

Rugian koman ni Bernadette ti sumang-at a nakaparintumeng idi nagsardeng a kellaat. Nakitipon ti kannawan nga imana iti makannigid ket naidennet ti apuy ti nakagangat a kandela kadagiti ramayna. Nagpaut daytoy iti agarup sangapulo ket lima a minutos. Ngem kasla awan ti epekto ti apuy ken ni Bernadette.

Nagpasango ti ubing iti nangatngato a paset ti groto ket naginnukas dagiti imana agingga iti saanen a madilpatan ti apuy ti kandela ti makannigid nga imana.

Kalpasan ti panaggibus ti panagkararag ni Bernadette ken panagpukaw ti raniag iti rupana, timmakder ket pumanawen idi maysa a nakasaksi iti napasamak ti nangkiddaw nga ipakitana ti imana.

Inamiris daytoy ti makannigid nga ima ni Bernadette ngem awan ti makitana a pakakitaan a nauram wenno naglatunot laeng koma.

Kiniddaw ti lalaki a magangtan manen ti kandela sana impalasat ti apuy daytoy iti baba ti makannigid nga ima ni Bernadette. Dinagdagus ti ubing nga inyadayo ti imana sana kinunana: “Puorannak metten!”

Sumagmamano a tattao ti nangpaneknek iti daytoy a napasamak.

Kinapudnona, dakkel ti epekto daytoy a napasamak kadagiti nakasaksi.

Maysa kadakuada, maysa nga agnagan iti Julie Garros ti simmurot ken ni Bernadette a simrek iti Convent of Nevers kas Sister Vincent.

Sabali pay, ni Bernard Joanas, kaarruba da Bernadette a nakaimatang iti napasamak, ti nagbalin a curate iti Lourdes ken nagbalin a chaplain iti Lourdes Hospice nga inimatonan dagiti Sister of Nevers.

Adda pay dagiti nangipalgak a saan laeng a daytoy a naimatanganda ti napasamak no di kadagiti pay kabayatan dagiti immuna a panagparang ti Babai ken ni Bernadette.

(Adda tuloyna)