Dagiti Aparision ti Birhen sadiay Lourdes (Tuloyna)

Salaysay ni Samuel Allan Esperanza

 Maikatlo ken maikapat nga aparision

Nagpakpakaasi ni Bernadette iti inana a mapan iti groto. Saan a kayat a palubosan ti inana. Naimbag ta nairana a simmarungkar da Madame Millet ken Antoinette Peyret, agpada nga aktibo iti Children of Mary iti Lourdes ket inaramatda dayta a gundaway a nangallukoy iti ina a kuyogenda ni Bernadette a mapan iti groto idinto nga impatalgedda a dida ipalubos a madangran ti ubing.

Manipud idi naammuan ni Antoinette ti maipapan iti aparision, masansanen a sumarungkar iti balay dagiti Soubirous ket nagsalsaludsod ken ni Bernadette mainaig iti nakitana iti groto. Namati ni Antoinette agsipud ta awan a pulos nagbaliwan ti estoria ti ubing.

Iti kabigatanna, Pebrero 18, Huebes, kalpasan ti misa, nagkukuyog da Bernadette ken Madame Millet ken Antoinette a nagturong iti groto. Nangikuyog ni Madame Millet iti nabenditaan a kandela idinto a pluma ken papel ti imet ni Antoinette.

Immuna a dimmanon ni Bernadette iti groto. Nakaparintumengen ken agkarkararag idi makasangpet dagiti Madame Millet ken Antoinette. Nagkararag met dagiti dua.

Madamdama, imbalikas ni Bernadette: “Addan! Addan!” Ngem awan met ti makita dagiti kaduana.

Inted ni Antoinette ti pluma ken papel ken ni Bernadette tapno isurat ti Babai dagiti kayatna nga ibaga kadakuada.

Ngem insungbat ni Bernadette a kinuna ti Babai a saan a kasapulan nga isurat ti ibagana kenkuana.

Impalgak pay ni Bernadette a kiniddaw ti Babai ti ipapanna iti groto iti sangapulo ket lima nga aldaw.

Nagkararag manen dagiti tallo. Idi nagpukawen ti aparision, nadakamat ni Bernadette a kinuna ti Babai kenkuana a “dina ikari a maipaayanna iti ragsak iti daytoy a lubong, no di iti sumaruno.”

Kinuna pay ni Bernadette nga idi dinamagna ti nagan ti Babai, nagtamed daytoy a siisem ngem saan a simmungbat.

Idi madamag dagiti nagannak ken ni Bernadette ti napasamak, ad-addan ti nariribukanda. Simngay kadakuada ti adu a saludsod ngem awan ti maarikapda a sungbat.

Tapno mapalag-anan ti riknana, kinapatangda ni Aunt Bernarde.

Nakuna ni Bernarde a nagbiddutda iti saanda a panangkuyog iti ubing iti ipapanna iti groto tapno maimatanganda ti napasamak. Insingasingna a kaduaenda ni Bernadette sakbay ti amin tapno makaparnuayda iti opinion kas maibatay iti makitada ken tapno matinongda ti iwayatda nga aksion iti masakbayan.

Pumarbangon idi nagturong da Bernadette ken dagiti dadakkelna ken antina iti groto ngem iti baet dayta a kasapana, adu dagiti nakasiput kadakuada ket walo ti simmurot kadakuada.

Idi makadanonda iti groto, nagparintumeng ni Bernadette sa nagkararag. Madamdama pay, nakita dagiti simmurot kenkuana a limmawag ti rupana ken kasla nailansa iti yanna. Narigat koma a patien ti ina ni Bernadette no dina nakita ti panagbaliw ti ekspresion ti rupa daytoy.

Nagpaut ti aparision iti treinta minutos. Kalpasanna, linidlid ni Bernadette dagiti matana a kasla kagapgapuna iti pannaturog.

Insalaysay ni Bernadette a naragsakan ti Babai gapu iti panangtungpalna iti karina nga ipapanna iti groto. Nakuna pay ni Bernadette nga imbaga ti Babai nga addanto dagiti palimed nga ilatakna kenkuana.

Nadakamat pay ni Bernadette a bayat ti panagparang ti Babai, adda dagiti nangegna a napigsa nga agriringgor a boses nga aggapu iti karayan a mangibagbaga kenkuana nga aglibas. Ngem idi taliawen ida ti Babai, nalapunos kano dagitoy iti buteng ket naglumenda a naminpinsan.

(Adda tuloyna)