Dagiti bank accounts ni SC Chief Justice Renato Corona

Dagiti bank accounts ni Supreme Court Chief Justice Renato Corona iti Philippine Savings Bank no sadino a limtuad nga adda dagiti depositona a saan a nairaman iti statement of assets and liabilities and network ti narigat nga ipalawagna. Ti kaadda dagitoy a bank accounts (peso accounts) a kuna ti prosekusion a saan a maitutop a naullomna no maibatay iti sueldona a kas chief justice ti sakit ti ulo tatta dagiti abogadona aglalo ita ta nagdesisionen ti impeachment court nga awatenna dagitoy uray no maibilang a “nasabidongan” ti pannakagun-od ti prosekusion kadagitoy a dokumento.

Kadagiti mangsursurot iti impeachment trial, saan a makapnek a dagiti laeng abogado ni Corona ti mangipalpalawag kadagiti natakuatan a bank accounts ken aglinglingedda iti teknikalidad tapno saan a mairuar ti kinapudno mainaig kadagitoy. Kasapulan a ni Corona a mismo ti mangipalawag kadagitoy kadagiti senator-judges no kasano a napataudna dagitoy iti baet dagiti alegasion nga ill-gotten dagitoy (nupay saan nga inawat ti impeachment court a mairaman ti ill-gotten wealth iti Article of Impeachment No. 2 gapu iti depektibo a complaint ti prosekusion).

Wen, kasapulanen a saanen nga agtaktakder lattan ni Corona iti likudan dagiti abogadona a manglaplapped iti pannakaibulos a maiparang dagiti amin a bank accountsna nangruna dagiti napudasdasan a dollar accounts babaen ti manto ti teknikalidad. Kasapulan nga isu a mismo ti mangipalawag iti impeachment court no ania ti kinapudno kadagitoy a bank accounts bareng awaten a kas gospel of truth dagiti umili ken dagiti senador-judges.

Ngem nakadidillaw ti imbalikasna a sisasagana a sumango iti impeachment court no palubosan dagiti abogadona. Isu ti maseknan, apay a dagiti abogadona ti ipatpatuboyna a mangted iti pammalubos kenkuana? No awan ti ilemlemmengna, apay a kasapulan nga agsammaked kadagiti abogadona no sumango wenno saan iti impeachment court?

Iti nagsasaruno nga interbiona iti media, impetteng ni Corona nga awan ti kinapudno dagiti maipabpabasol kenkuana. Ngem kas nakuna ni impeachment court presiding judge Senator Juan Ponce Enrile, saanda nga awaten nga ebidensia aniaman nga impakpakdaarna iti ruar ti impeachment court. Dagiti laeng sawenna iti impeachment court a mangpaneknek nga awan ti kinapudno dagiti alegasion maikontra kenkuana ti awatenda.

Adda ngarud iti bola iti ima ni Corona. Daytoy ti tagtagiuray dagiti tattao a dumteng bayat ti panagipresenta ti depensa dagiti dokumento a mangdalus iti naganna.#